喜記的避風塘炒蟹，好食到遠近馳名，指明要拎走的客亦不少，老闆有見及此，特別斥資2萬元，引入一部真空打包機，從今以後，就可以原汁原味咁打包避風塘炒蟹返屋企啦！
記者：何善華
攝影：周旭文
老闆喜叔話，這個避風塘辣蟹打包技術在2年前已開始構思。「當時見到不少熟客食完蟹都會另外order多一隻打包拎走，但用發泡膠盒卻會流失蟹隻本身的鮮味，後來我嘗試不同方法將蟹隻嘅味道保存，終於發現密封真空包裝，最能令食客在何時何地均品嘗到喜記的炒蟹口味。」喜叔更特別引入了一部價值2萬元的抽真空機。他表示打包技術雖然增加了12蚊的炒蟹成本，但為了回饋食客，決定不將價錢調整，以舊價推出市面。
「每天限售50隻抽真空炒蟹，所以顧客一定要早一日打電話來預訂。」喜叔重話，喜記是第一家研製及發明避風塘辣蟹打包技術的食店，因此已向當局申請專利。而每盒抽真空炒蟹均可保存1個月，足夠讓食客隨心所欲去品嘗心頭好。
能稱得為喜記嘅鎮店之寶，當然唔係僥倖，蟹隻的選料尤其謹慎，喜叔話南越鹹淡水之間嘅蟹就最鮮甜惹味，肥大到兩雙蟹箝「頂晒角」。經過秘製嘅蒜茸辣椒加工後，包保食到停唔到口。
五香粉炮製嘅瀨尿蝦，加了喜記獨家炮製嘅醬料更加惹味。
椒鹽鮮魷要炒得好，時間和火候要拿揑得恰到好處，才能令鮮魷入味之餘，炒粉亦不會大大嚿，這樣才能真正享受到魷魚嘅鮮味。
正宗避風塘口味的豉椒炒蜆，少辣卻多滋味，是佐酒最佳之選。
喜記炒蟹專家
地址：灣仔謝斐道392號H舖地下
電話：28937565
營業時間：5:00pm-5:00am