顧客叫一聲董建華，牛扒店免費送出一客田螺頭盤。經濟低迷，餐飲業同行不能坐以待斃，自救出奇招。董建華三個字，值乜錢呢。有番些少實際用途，不是空口白話，算係回饋社會。
治港多年成績匱乏的董建華，好心做壞事，心有餘而力不逮。照計，一喊董建華，應該即刻送佢打孖套裝偉哥。偉哥雄風，不必懷疑了，路直路彎，唔掂砌到掂，有偉哥伴你同眠，就算董建華開倒車，你一樣感受speeding的快感，而且肯定不會事後收到牛肉乾。叫董建華送偉哥，讓你得到相等於叫床的樂趣。
叫董建華有偉哥送，喊其他高官，一視同仁，刺激經濟，由喊三聲開始。喊阿蟲，得到一輛情操高尚的超級豪華BB車！喊兩聲，送你一枝凍啤，喊多聲，嬌豔洋妞即場投懷送抱，免費任攬。你問，任攬任錫對經濟有乜實質刺激作用呢？我們沒有獨立調查委員會，只好憑阿蟲眉頭眼額的嗒糖樣，估計，應該幾激。信佢。
喊保安局長芳名送乜好？送纖體療程相當時尚，瘦身排毒Spa都唔錯，OL實鍾意。送23條……繩，亦見心思。23條，你一個人用唔晒的，上吊都唔使23條咁多。咁講法，要23做乜？擺到明唔係益用家咁簡單！