大家重記得「膚淺事件」否？上一回董特首在立法會發火，同陳偉業火併，已成特區佳（笑）話。噚日董生正式通知班尊貴議員，佢老人家會履行承諾，下個星期四會再去立法會開答問大會，任議員提問，以示有決心同議員加強溝通。
老董近日狀態小勇，未宣布失業率，佢已彈出嚟講創造職位；未簽字，昨日又出嚟攞威，話已經搞掂「最緊密安排」協議；重邀請埋中央領導六月三十日南下主持簽約儀式。咁高姿態，睇怕總理溫家寶已經答應嚟香港同佢打打氣，挺一挺。
早前有人擔心七一大遊行會嚇親領導人，其實溫家寶點會驚香港區區十萬八萬人上街。想八九年仲夏，三百萬群眾喺北京長安大街為反貪污，反腐化大遊行，最後啲學生重佔據天安門廣場，溫文爾雅，一派學者風範嘅溫家寶當時就以總理趙紫陽智囊身份，陪趙一起漏夜到廣場勸學生撤退。趙總理說「我來晚了」嘅鏡頭，八方仍歷歷在目；既然當年不怕，今日又點會怕？
講開又講，當日喺立法會，陳偉業話要「告御狀」時，俾老董譏佢一句「好呀」，今次真係大好機會。點知陳偉業話，次次領導人來港，都唔會見民主派議員；不過，如果有機會見到溫總理，佢一定會讚佢炒官員炒得好，而老董就跟都唔識跟。既然講明會篤背脊，你估老董會唔會咁笨畀佢見溫總？
傳真︰2623-9278
電郵︰