早排馬會為準備賭波規範化舉行招聘日，造成由灣仔排到中環嘅萬人空巷求職奇景，馬會主席夏佳理夏叔受到全城讚賞，讚佢為死寂嘅勞工市場，提供咗三千幾份薪高糧準嘅好工，更可能拯救咗唔少失業等開飯嘅家庭。
不過夏叔呢一招，得罪唔少尊貴嘅立法會議員。有人同八方投訴，話賭波規範化條例都未過，馬會就請咗咁多人，簡直係將班議員「抬上神枱」。
如果唔過條草案，啲議員就全部變成「千古罪人」，打爛市民嘅飯碗，咁唔係畀壓力係乜呢？所以佢未必去投票，就算投，都會反對。
其實民間對賭波規範化都重有好大反對聲音，立法會通唔通過都係五五波，夏叔偷步做招聘會掂唔掂，大家就要拭目以待啦。
傳真︰2623-9278
電郵︰