港股噚日又係唔肯跌，恒指最終升6點收市，收9862。好友似乎真係話晒事，佢要個市點就點，但睇番期指未平倉合約突破8萬張，淡友又好似未驚過，低調得嚟又有啲深不可測。趙飛雲身邊唔少朋友睇淡，但個個都係打游擊，唔對路即刻鬆人，賺到些少亦計數，冇話明刀明槍對着幹，左計右計一般散戶冇可能揸咁多淡倉，擺明係超級大戶。好淡博到咁盡，港股真係愈睇愈唔尋常。
近排鬼子佬主要唱淡，上周六則有份愛國報紙頭版標題「港股勢破萬點大關」，似乎壁壘分明，唔通又嚟一次官鱷大戰？
趙飛雲愈睇愈心驚，惟恐殃及池魚，所以寧願俾人鬧攬住啲錢唔做嘢，亦好過企錯邊，搞到慘淡收場兼夾累街坊。講句真，趙飛雲真係唔明好友點解要頂得咁行，唔畀個市略作健康調整，借助其他等買貨的散戶之力衝關？有老友話，呢啲係典型中資炒股嘅作風，所以每次中資股炒浪都係升得急又跌得快。
倉內兩隻股走勢平平，意科（943）跌1個價，收0.315元，睇勢似係逐步建立上升通道，守穩0.30元仍係反覆向好，繼續持貨上望。海域（1220）跌至10日線反彈，回升1個價，收1.37元，10日線快將回升，可伺機加注。海域分拆的海域化工（2882），發售1.18億股，每股定價0.88元，其中1.06億股配售，1100萬股公開發售，於6月30日掛牌。如果月尾係好友得勢，相信海域化工有一番熱鬧。
趙飛雲