本報早前報道何超儀會與男友陳子聰在十一月結婚，其後傳媒報道婚禮的地點與形式出現多個版本。何超儀昨日接受本報訪問時，終於親口證實婚訊，她表示明白父親何鴻燊盼她結婚已久，所以決定十一月在澳門旅遊塔舉行盛大婚禮，隨後會往法國南部或西班牙的度假勝地Ibiza度蜜月。
何超儀月前被老友盧巧音踢爆婚訊，當時傳出多個婚禮版本，一時說會往陳子聰老家澳洲舉行婚禮，又傳出過在泰國布吉BanyanTree行禮，前日又有指兩人會爬上澳門旅遊塔尖交換戒指。昨日超儀接受本報訪問時坦認婚訊，婚禮舉行地點確在澳門旅遊塔，但卻否認會在塔尖交換戒指。
超儀與子聰拍拖五年半，她表示兩人一直有計劃結婚，但雙方均認為未準備好。直至去年聖誕節，適逢是超儀生日前夕，子聰與大班朋友瞞着她，稱是舉行普通派對，在數十朋友面前，準備好鮮花、超儀最愛的《飛天小女警》主角毛毛的氣球以及戒指，即場向她求婚，超儀說：「咁多人睇住，佢又輕輕跪一跪，梗係應承啦！」
其後好友盧巧音在月前踢爆婚訊，超儀說：「盧巧音冇講大話，只不過當時唔想咁快揚出去，一來當時我爹哋出外避炎，我哋全家都同佢斷絕聯絡，加上我屋企咁多家族成員，我都要逐一通知交代㗎，同埋個婚禮點搞，搞大定搞細、喺邊度搞，請幾多人都要傷腦筋。我真係要多謝盧巧音小姐咁大力宣傳，啟發到我大家姐（何超瓊），話開心事應該要普天同慶，所以咪決定搞一搞佢囉，我前幾日終於同我爹哋取得聯絡，同佢提起呢件事，雖然唔知佢領唔領略到我講乜，但係我知道佢『餓』我結婚呢日好耐㗎啦。」
至於早前傳她會在布吉BanyanTree舉行婚禮，超儀否認說：「呢個講法係假嘅，佢哋自己幻想嘅啫。」而在家族旗下的澳門旅遊塔塔頂交換戒指的說法，超儀說：「大好日子想自殺咩！幫屋企做宣傳都唔使咁盡，畀埋條命佢㗎！」她說：「喺澳門塔搞婚禮就真嘅，到時一次過招待班親朋戚友，我諗三、五百人都走唔甩㗎啦，大家放心，嗰日嘅婚禮一定會着條裙見大家，切餅同合巹交杯實冇走雞嘅。」問她這個盛大婚禮會不會耗資千萬？她說：「又唔係我畀錢，我點知呀？」超儀並指完成這個盛大婚禮後，會與子聰往外地度蜜月，地點至今尚在考慮中，她說：「可能去法國南部或者西班牙嘅Ibiza啦。」
而超儀在婚禮所穿的婚紗及子聰的禮服，則會由王菲形象指導TitiKwan負責設計，她說：「Titi係由我入行睇到我大嘅好友，我同佢講咗套婚紗要simpleelegance、骨骨子子、斯斯文文。」她並指結婚這個決定並不代表她成熟，她說：「鍾意咪去做囉，我結咗婚後會揀啲自己真真正正鍾意做嘅嘢去做，唔會好似𠵱家咁，或者先去助養番幾個落後地方嘅細路仔咁啦。」
採訪：梁錦貞
