多隻眼鏡股中，泰興光學（389）已經成功批股，股價一直企穩在配售價3.50元之上。經紀黃話，配售搞手識得搵戶好人家，英資行近期當旺，戰績異常厲害。
唔知係咪因為泰興配股有芬佬接貨，兼且配股後股價表現好，其餘眼鏡股亦有配股傳聞，包括股壇長毛同埋金手指都有貨嘅雅視光學（1120），同埋新興光學（125）及即將在本月26日公布全年業績嘅高雅國際（907），但佢唔肯定傳聞中嘅配股係賣舊股，定係好似泰興咁屬公司集資。
小初聽完，真係嚇咗一跳，但其實亦難怪，工業股十年難得咁旺市，唔伸手要錢實在對唔住自己。
經紀黃話，佢問過公司嘅分析員，佢哋對眼鏡股未來業績表現，唔係估得特別好，除咗芬佬求貨外，其實唔明眼鏡股有乜嘢好？3隻眼鏡股中，雅視成交較活躍，新興次之，至於高雅則屬乾升格局。
慕容小初