無論係貓迷、卡通迷定係漫畫迷，都一定會好鍾意日本漫畫《What'sMichael?我為貓狂》入面隻醒目貓米高，呢套漫畫已經完咗十幾年，不過最近居然翻生！
唔經唔覺《What'sMichael?》已經有成二十年歷史，漫畫家小林誠八四年開始喺日本漫畫雜誌《周刊Morning》入面連載呢套漫畫，直到八九年出到第八期單行本至完結。事隔十四年，米高之所以重現江湖，聽講係因為有唔少人好掛住呢隻貓仔，小林誠喺漫畫雜誌總編盛意拳拳之下，再次繪畫米高嘅故事，佢話相隔十四年先再出新一期單行本，都算係一項世界紀錄喎！
小林誠今次真係落足心機，花咗成年幾時間畫咗十八個全彩色故事，除咗同真貓一樣好招積、又會使出鹹豬手胸襲索女嘅米高之外，大家重可以再次睇到佢嘅女友波波同肥貓嘉德利奧嘅趣事。小林誠重畫咗個米高BB時代嘅漫畫，呢隻貓仔竟然可以搞到原本唔鍾意貓嘅設計師，最後都唔捨得佢走，要一個人匿埋喊㖭！