港股噚日反覆升6點，收報9862，午後買盤略為轉強，唔通又有資金偷步入市，炒中港月底簽零關稅協議，以及世衞將香港從疫區名單中除名？聯通（762）尾段發力，升近5%至5.40元，成交達1.61億元，花旗美邦大手狂掃，好似有景轟。
國企股則有散貨現象，馬鋼（323）噚日一度急升逾9%，高見1.31元，其後即見唔少中資經紀牌沽出，搞到股價升幅收窄至3.33%，收1.24元，成交高達2.52億元。
不過期間見到滙證出手接貨，唔知係咪歐資想接手跟炒呢？中國領導人話明，七一回歸慶典前送香港一份大禮，擺明想托市製造昇平景象，相信中資會繼續炒高港股，直至回歸慶典之後。
ｉ師傅話，傳聞雅視光學（1120）短期內會收購一些品牌以拓展業務，後市可能重有得炒。此股一直係DavidWebb愛股，早前亦炒過一輪，調整至2元樓下反彈。不過，公司去年業績只增長3%，唔算吸引，而行內亦普遍預期此股今年業績將會倒退。其實工業股好難再吸引投資者追捧，除非雅視日後有新收購，提高增長速度又另作別論。
講開工業股，噚日又傳出有工業股想批股，其中廣興（1131）有4000萬股大手成交上板，每股作價0.84元，較前日收市價0.93元，折讓幅度近11%。
據近排經驗，工業股配股予基金後都會造好，廣興又真係上升3.23%，收0.96元。阿虎左睇右睇都睇唔到廣興有乜業務咁吸引，但亦可能係阿虎眼界太膚淺。
阿虎