張慧儀昨日凌晨疑被未婚夫霍紹裘掌摑傷及臉部而報警。張慧儀本周四本出席新片《女人3X》開鏡禮，她是女角之一，飾演經理人一角，與旗下藝人發生姊弟戀，奈何慧儀昨日遭逢情變，電影公司揚言隨時臨陣易角。
張慧儀昨日凌晨與拉丁舞導師未婚夫霍紹裘發生衝突，其後她前往報警求助，聲稱遭霍紹裘掌摑傷臉。本來張慧儀在本周四會出席新片《女人3X》的開鏡禮，下周初正式開工，負責投資該片的「新星堡娛樂製作有限公司」得悉張慧儀被打後，大為緊張，惜張慧儀昨日音信全無。「新星堡」方面表示，若於明日下午前仍未聯絡得上張慧儀，便會臨陣易角。
「慧儀𠵱家好亂」
昨日本報致電「新星堡」負責人Carol，她說：「其實慧儀個古仔都有少少同佢度身訂做，呢個禮拜四就會開鏡，我哋今日（即昨日）知佢發生呢件事之後，已經call咗佢兩次，但佢重未覆，我哋都希望畀啲時間佢冷靜吓。我諗慧儀𠵱家都好亂，發生啲咁嘅事會好hurt。希望佢可以嘅話，都畀個電話我哋，等大家知佢嘅情況係點。」
「換角經常發生」
Carol又說：「我哋最遲會等到後日（即明日）下晝，我哋都要拍嘢，唔想亂晒陣腳，我哋會再睇吓情況點，唔排除有換角嘅可能，呢樣嘢要大家體諒，我哋都唔想，但真係唔得都冇辦法。」
《女》片為「新星堡」首部投資及製作之電影，惜在開工前卻發生慧儀疑被掌摑事件，Carol對此說：「其實換就時時都會發生，呢樣唔算好嚴重嘅問題，況且慧儀都係受害者，我哋唔會埋怨或者怪責佢。」
《女》片由鍾澍佳監製，片中有三個以女性心態為主題的愛情故事，演員包括譚小環、姚樂怡及謝天華等。現年二十九歲的張慧儀在其中一個故事扮演經理人，與飾演藝人的二十一歲新人劉家聰發展姊弟戀，故事講述慧儀與劉家聰日久生情，二人為避嫌轉玩地下情，結果被公司踢爆，張慧儀只好黯然離職，幸劉家聰對她不離不棄，姊弟戀終開花結果。
「外人好難明白」
記者昨日聯絡曾與張慧儀傳緋聞的陳百祥（阿叻），他說：「外人好難明白，兩個人嘅事，第三者好難去講，我都唔清楚係乜事。」而張慧儀的前男友盧慶輝，昨在電話中說：「我唔想再同佢擺埋一齊嚟講，冇嘢回應。」
採訪：朱芷瑩
