公關靚女K上星期突然去咗泰國放假幾天，返到嚟就好風騷咁話：「以後叫我做鍾太啦。」左丁山為之愕然，乜現在啲年青女子結婚都咁神秘，重要走到去泰國？
靚鍾太話：「曼谷BanyanTree酒店有一個結婚套餐，四天住宿連結婚費用，收萬五六銀。我同鍾先生兩人去到，當我哋係皇帝女咁服侍，婚禮由酒店高層主持，因為我冇宗教信仰，所以唔請牧師、神父或者僧人，其實酒店可以安排晒㗎。結婚場地喺五十一樓，有千幾呎，酒店管理人員全部到場祝賀我哋。結婚前穿婚紗，六七個女士服侍，我話對鞋唔啱，就有人去搵對鞋，我話朵花唔啱色，就有人換花！婚禮完成後，全部人撤退，喺五十一樓按摩水池旁邊擺下餐枱畀我哋兩人享用晚餐，欣賞曼谷夜景。返到房，張King'sBed鋪滿紅玫瑰，砌成心形，全房校好燈光，點晒香薰，羅曼蒂克到我唔想破壞啲陳設。
第二晚我哋出外玩完，返到房，浴室點晒燭光，浴池浸滿一池鮮花，等我哋浸浴。嘩，我直情開心到喊咁滯，試問呢啲安排，呢啲價錢，香港酒店邊度有可能做得到！」
未試過，唔知噃，鍾生鍾太自曼谷天堂回來，重墮塵世，預備九月到婚姻註冊處註冊，擺酒。左丁山另一位女友靚女W，以前一個月去BanyanTree一次做Spa，做到上咗癮。不過𠵱家香港進入無薪假期時期，靚女W都冇心機去咯。