相約好朋友食飯，其中有幾個都係打緊政府工，提起各人嘅老細，大家不約而同唉聲嘆氣，炒蝦拆蟹。「𠵱家好多做緊高官嘅，根本都唔係做官嘅材料！」友人甲呷着啤酒，帶點怒氣地說。「咩解呢？」「做得高官嘅人基本上由細到大都諗住做官，有晒做官嘅準備，即係好似聽講陳法蓉細個嗰陣最鍾意披條大毛巾玩選香港小姐，結果第時大個真係俾佢選中港姐，重做得幾好㖭。」友人乙向來喜歡跟八卦新聞，睇報紙都先睇娛樂版，對港姐來龍去脈一清二楚。
「要數最有代表性嘅，莫如阿財爺。」友人丙似乎最火滾，一發不可收拾。「一啲政治智慧都冇，堂堂一個財爺，老夫少妻，明明食緊朝廷俸祿，又將國寶搬返屋企私人收藏，重要奉子成婚……」「呢啲都係人哋嘅私事啫。」企圖㩒一㩒友人丙把火，點知唔㩒猶自可，一㩒重把鬼火。「做得財爺邊有分公事私事，基本上乜嘢都關香港人嘅事，唔好諗住當初放棄商界嘅高官厚祿就會得到萬世景仰，𠵱家係做公僕，做得好係應該，做得唔好自然俾人追住嚟鬧。唔止個財爺，重有好多個本來唔係做開官，𠵱家無端端被欽點做大官嘅不知所謂官……」「啲餸都經已嚟晒，不如食嘢先！」
「唔得，講埋先……」結果友人丙當晚乜都冇食，夾錢之餘，返屋企重要淥公仔麫。