上個拜禮六，蘭西搭地鐵，見到長和系馬鞍山海澄軒酒店廣告，其中一個宣傳賣點，係酒店窗戶可以開關，重話可能係全港唯一有呢個設計嘅酒店。
咁都算係賣點，認真難明。
不過，酒店窗戶唔用密封式設計，好似變成潮流，因為上個禮拜，城規會審議新地汀九酒店項目，就係申請採用獨立空調，同埋窗戶可以開關。不過，城規會話要發展商提供多啲資料先肯受理。
點解發展商起酒店，要啲窗戶可以開關呢？唯一合理嘅解釋，就係發展商根本唔係淨係諗住做旅客生意，重想吸納本地長期租客，因為呢類長期租客，可以為酒店提供一定嘅入住率保證，就算少咗旅客來港，酒店都唔使咁慘。
𠵱家酒店可以提供獨立冷氣，同埋窗戶可以開關，遲啲會唔會連廚房都有埋呢？咁就真係同住宅冇乜分別嘞。唔知啲旅客又有乜感想呢？
代理為咗爭客，間唔中都有推撞，甚至打鬥嘅場面，但情況開始發展到令人擔心嘅地步。
蘭西聽發展商講，代理打人事件，好似已經變成有組織嘅行為，同一班人，喺每個盤都專登撩事鬥非，通常都係打對手嘅主區或者主力員工，等自己友可以爭到客，做成生意。
搞成咁，估計係公司縱容。發展商好擔心，有朝一日搞出大件事，到時唔知點收科。
究竟點至可以防止代理打鬥事件發生，發展商認為，加重罰款最有效。無他嘅，代理咁搏命，都係為錢啫，罰得重，佢哋點都會收斂啲。
睇嚟以後發展商推盤，都要先收定代理一大筆罰款按金至得嘞。
政府話要管制地產代理時，代理業就話會自律，但發生打鬥時，就話生活迫人，似乎唔多通。
行內估計，地監局因為要加多好多人手，去各樓盤售樓處，監管代理一舉一動，開支重咗，可以大條道理加代理牌費㖭。
蘭西禮拜六去太子大廈買煲，可惜間煲舖六點鐘已經閂咗門，於是在商場四圍逛，一眼見到電盈基建主席李智康同埋佢「老闆」──李太是也──一齊行過，佢話自己正準備去買嘢，不過係去歐洲買，當晚就飛。至於佢個「董事長」（李家寶貝BB），就冇同行。
咁李智康去歐洲買乜呢？原來係數碼港第二期密鑼緊鼓要推出，要去辦貨。記得數碼港第一期住宅項目（貝沙灣）開售前，佢周圍去，搜羅一大批枱、燈、椅、裝飾品……用嚟布置個售樓處會所，搞出一個超豪feel，今次第二期要賣，當然要搵過啲新鮮靚嘢，讓大家欣賞欣賞。
一場「沙士」疫症，令全港市民都關注樓宇衞生，政府重話，舊樓業主唔肯成立業主立案法團嘅話，會強迫成立，重幫佢哋請管理公司，為大廈檢查同維修。
蘭西聽業內人士講，原來房屋及規劃地政局局長孫明揚，喺「沙士」爆發前，已經同佢哋傾過呢個問題。
今次趁住「沙士」事件，就搵咗深水埗區嚟做試點。
物業管理公司，唔抗拒政府呢個做法，但對於邊個負責向業主收錢，就有保留，佢哋最希望由政府出面。𠵱家個個都觀望試驗結果至表態。
噚日係父親節，為人子女，一定會花啲心思，為父親慶祝佳節。
已經有好多年都冇樓賣嘅和記黃埔，今年推出青衣樓盤藍澄灣，負責賣樓嘅和黃地產副董事總經理徐建東，因為要睇住樓盤銷情，就第一次唔可以喺正日同父親慶祝。
佢同蘭西講，今日會再同爹哋補食飯，同送番份禮物畀佢。
計我話，只要孝順，天天都可以係父親節，日日都可送禮同食飯，天下嘅父親，都會咁開心。
可能係近排個市好番些少，啲記招就鋪天蓋地咁嚟。
以往拜禮一，通常都係靜日，近兩個拜禮，已經唔同晒，記招檔期密麻麻。
好似今日就有八單，上晝下晝點都會同行家撞期。
金豐鴻運上個禮拜因為遇着太多記招會同時間舉行，結果開唔成嘅記者會，就揀今日補番。
同一時段，就只係得新地嘅YOHOTown一單記招啫。
另外，協成行嘅中環總部，就揀咗今日上晝十點半開始搞開放日。
下晝就有九龍倉深井碧堤半島，同嘉華何文田嘉多利豪園齊齊開新示範單位。重有係長實荃灣朗逸峯，公布信用卡付款優惠，和黃藍澄灣公布開賣詳情，同埋美聯公布強化版本互聯網站詳情。
蘭西
電郵地址：
