雖然歐洲四大聯賽只淨番西甲聯未收咧，不過，好似歐洲次級一啲嘅聯賽同埋美國大聯盟（MLS）咁，都一樣難唔倒我哋嘅名家；前日無論係西乙聯、北歐聯賽，抑或大聯盟嘅推介，都應該令捧場客賺唔少。
講開美國大聯盟，我求大俠都係捧場客，佢哋水準唔係太高，但勝在入球多，都幾有娛樂性，而且資料齊全，落注一定唔使盲中中；而前日見到曾經喺香港踢過波嘅蘇格蘭前鋒「矮腳虎」史賓沙，喺科羅拉多急流有一個入球同埋一次助攻，協助球隊以四比一贏咗新英倫革命，都覺得好安慰。
不過，有開美國大聯盟賽事嘅盤口或者係標準盤嘅博彩公司並唔係咁多，好多英國著名博彩網站都冇呢瓣玩；如果有興趣嘅朋友，相信就要「過大海」，幫襯濠江嘅博彩公司喇！
拉素始終唔肯向陣中球星妥協，堅持用股份當出糧，同埋落實來季減薪四成半。後衞史譚死都唔續新約，更忍唔住揶揄會方：「我唔可以攞啲股份去超級市場買嘢喎。」呢番話唔單止象徵佢同會方決裂，亦顯示佢對拉素前景唔樂觀，覺得啲股份唔值錢。
列斯主席、有經濟教授銜頭嘅麥堅尼斯上得任梗係數口精，斷唔會好似前主席列斯杜爾洗腳唔抹腳。佢噚日就話維杜卡多多錢都唔賣，但阿仙奴有興趣嘅基維爾同埋龍門羅賓遜就有得傾，但佢話要搵彭拿治再加現金交換；要攞兵工廠最有潛質嗰位後生仔，老麥你真識揀囉！
格拉斯哥流浪嘅三十二歲型男前鋒莫米高，早前話對會方開出一年續約條件唔滿意，會季後離隊，但球會啱啱話呢位前荷蘭國腳已同意留效；其實現時歐洲球壇風雨飄搖，一把年紀重可有機會踢到一支下屆參加歐冠盃嘅蘇超班霸，重想點呀？
來季被祖雲達斯回收嘅米高利，近日話如果會方唔保證佢踢正選，就寧願走頭，重講明拉素同帕爾馬都想簽佢。祖記從來唔賣球員帳，呢位小朋友講呢番話對佢未必有好處；同佢一齊被回收嘅巴拉斯就虛心好多，話任會方差遣，比米高利世故得多啦。
男歡女愛有時實在唔係局外人可理解，但唔知道英格蘭國家隊門將占士，會唔會寡情薄倖到唔理前妻嘅慘痛經歷。話說占士早前拋棄糟糠兼為佢生下五個仔女嘅艾曼達，移情別戀；不過艾曼達兩個月前與占士分手時已要入院割除子宮瘤，𠵱家又懷疑患上乳癌，仍要堅持離院返家照顧仔女，占士盡吓父親責任好喎！