上周五升市中，大隻股中最醒神嘅係中移動（941），由18.20元鏟上18.95元。差不多兩個星期，中移動好多日都低見18.20元左右即見底，今番推近本月5日高位19.10元，而成交又由11球大增至28球，有機會破位而上，第一關係20.20元，即係3月初頂位。
大市欲罷不能，搞挾淡友倉，中移動又會成為大戶嘅工具，對中移動亦有利。國內移動電話市場爭崩頭，成日都係咁，呢啲新聞唔使理住。
中移動睇住有得炒上去，搵一兩件Call輪玩吓。最多人買賣嘅係9706，8月杪到期，現價9.8仙，溢價8.1%，槓桿率19.3倍，冇錯交投旺同槓桿率夠晒爆炸，不過溢價8.1%又唔係細，想稍為穩陣而爆炸力又唔算弱嘅，可以揀9754，壽命長過9706，9月底至夠鐘，現價30仙，溢價只係2.9%，槓桿率仍有6.3倍。
上周五國企股好世界，帶起埋紅籌股。中遠太平洋（1199）升4.8%，破日前高位，創97年11月以來新高，Call輪9691彈升45%，隻輪同其他同類輪冇乜交投，難買賣。華創（291）升3%，升幅較小，有機會追番上去，Call輪可以諗吓。華創Call輪9270，上周五推介過，繼續買入。9月到期，現價6.3仙，溢價2.8%，槓桿率11倍，成交由37球急增至226球，好戲在後頭。
章 盛