三星部P408個個等到頸都長都未見蹤影，但係日前失驚無神就嚟咗部S200，打開部機一睇原來就係A500嘅彩芒版，重要係雙彩芒，唔單止內芒升為有128×144像素嘅65,000色，外芒亦用咗256色，閂埋機外芒更可以當鏡仔用。S200機身同A500咁上下厚，功能就有齊GPRS、40和弦、WAP及EMS等，開價$2,780都算OK，水貨S200𠵱家只得英文機，想玩中文就要睇吓行貨會唔會番。
查詢：23987320（鉑匯科技）
今次唔單止有部S200，重有部C100，直身機喺三星嚟講都相當少見，啱晒直身機Fans，而且重要大玩薄身，17mm厚度拎上手都唔覺大部，不過個65,000色彩芒就較為細個，未可以盡情發揮彩芒威力。功能就有GPRS、40和弦、WAP及EMS等，同S200差唔多，同樣只有英文機，唔可以顯示中文，不過以$1,450就有部三星彩芒機，仍然都有一定吸引力，起碼羅新基都諗住買部玩。
查詢：23987320（鉑匯科技）
西門子嗰幾部時裝四兄弟手機XELIER，羅新基唔少朋友都話個廣告夠晒過癮，雖然話就話會喺時裝店度賣，不過呢幾部咁有Gimmick嘅手機，手機舖又點會放過，落咗場都有成個禮拜，其中以大佬1號同三佬3號機最多人問，一個以價錢取勝，千零蚊貨仔就有交易，3號就以外形取勝，不過就要成三千幾蚊，所以老闆都話問嘅人多，買嘅就少。
文：羅新基