周末冒住大雨返大陸打波，真係辛苦到不得了，查實小初冇班經紀朋友咁大癮，但佢哋話一切已經Book好晒，點都要風雨不改，小初惟有奉陪，但要佢哋畀番多少好料補數。
小初見到創科實業（669）股價愈升愈有，而同樣係生產電鑽嘅旺城國際（2389），近呢半個月走勢亦非常好，旺城上周五升3.39%，收0.61元，成交配合升勢，所以問吓佢哋有冇得諗，但佢哋個個搖搖頭，話投機短炒就無妨，長揸就唔適合。
其中一個經紀老友問小初，記唔記得大約兩個月前，旺城曾經公布附屬公司存貨被扣，並且有應收帳可能收唔番，令股價急挫一事？此外，旺城稍後公布全年業績，雖然賺3205萬元兼派末期息1仙，但核數師則對公司財務報表有保留意見。
佢重話，據講旺城街貨主要由少數炒家持有，帳面計落應該重輸得好甘，可能係炒家想趁呢排工業股當炒，造番好些少唔使咁難睇。
慕容小初