年輕偶像歌手真係好識借紅過佢啲女歌星做宣傳，每逢有新碟出就特別多緋聞，不過佢終於玩出火啦！因為以前同佢玩埋嗰班年輕歌手都話睇佢唔起，覺得佢唔應該利用前輩女歌手，女歌手想拍拖就係人都知，年輕偶像突然變得咁殷勤，重成日陪住佢，係女仔都受啦！
女歌手重周圍拜託人幫呢個仔，身邊啲人明知佢俾人利用，但都唔敢出聲，因為知道佢聽唔入耳。
不過一向敬重呢位女前輩嗰班年輕歌手就好嬲嗰個偶像嘅所作所為，大家都杯葛佢，所以呢輪都冇乜見佢哋成班人一齊玩。而年輕偶像一向好識冧女，另一個大牌女歌手一樣俾佢冧掂，重愛到好麻木。唉！馮仁昭都冇眼睇咯！
環球二人女子組合2R嘅Race同Rosanne噚日喺奧海城出席活動，佢哋話雖然第一次公開表演，但一啲都唔驚。佢哋係嚟自新加坡嘅，𠵱家好積極咁學緊廣東話。問2R會唔會視女子組合Twins為假想敵，佢哋話：「冇得比，佢哋出道已經兩年，好多方面嘅經驗都豐富過我哋，我哋要向佢哋學習㖭。」
梁朝偉同章子怡噚日喺澳門嘅龍記酒樓拍《2046》，澳門嘅外景其實之前已經拍完，不過王家衛睇完片唔多滿意，決定補拍。噚日約凌晨一點，偉仔首先出現，佢依然保持住嗰個六十年代留鬚Look，同章子怡喺酒樓拍食飯戲。王家衛呢部《2046》拍咗兩年幾，啲演員都毫無怨言，有時馮仁昭都幾服王大導魅力。
近排忙住拍《無間道II》嘅余文樂，噚日喺尖沙嘴出席公開活動。阿樂話遲啲為部戲，要同陳冠希（Edison）一齊剪個好短嘅學警頭，阿樂話：「我同佢（Edison）都要剪，冇辦法啦，劇情需要，我都想專業啲。重好啦，頭髮短啲可以涼爽啲，洗完頭唔使等咁耐就瞓得。」
韓君婷同王合喜噚日喺灣仔拍新戲《18：零零》，韓君婷話自己喺套戲入面同王合喜演情侶，重令佢改邪歸正。問韓君婷細個時壞唔壞？佢話：「試過壞㗎，嗰時成班人食煙、媾仔又唔讀書，之後知道自己唔可以咁樣，咪唔同嗰班人玩囉！」
張豪龍同葉佩雯噚日喺九龍塘為新片《情陷掌門人》開鏡拜神，喺戲中張豪龍係李小龍迷，所以佢噚日就以一身李小龍嘅「青蜂俠」打扮出現，雖然豪龍本身唔係咁鍾意練武，但佢噚日示範踢腿都有板有眼。而為咗演好動作鏡頭，重特登搵咗李小龍第四代傳人教佢功夫，順便操弗自己嘛。
