繼謝霆鋒公開表示與梅艷芳結拜為姊弟後，昨日其舊愛張栢芝與李克勤在紅館合唱後，栢芝指克勤經常提點她，所以把對方視為哥哥，但又刻意補充說：「千祈唔好誤會，唔係其他關係呀！」似暗寸霆鋒與阿梅的緋聞。
張栢芝昨日與兩舊愛陳小春及陳曉東，齊出席紅館由商台及無綫合辦的《醫護群英響全城》節目，演出歌手還有Twins、余文樂、盧巧音、李克勤、陳慧琳、譚詠麟、Cookies及Beyond等。因大會安排每位歌手演出後便離場，故栢芝與東東及小春，以及余文樂與鍾欣桐及盧巧音兩組緋聞情侶，均沒有機會在台上碰面。
栢芝昨與克勤合唱一曲《Healtheworld》，事後她接受訪問時，大方表示在後台有碰到小春，但卻沒有看見東東。栢芝又大讚克勤說：「克勤好好人，經常照顧我、提點我，我當佢哥哥咁，千祈唔好誤會，唔係其他關係呀！唔係姊妹又唔係姊弟呀！」似有意暗寸舊愛霆鋒與契姊梅艷芳傳緋聞一事。問栢芝會否與克勤結拜？她笑說：「唔會喇！」
栢芝表示明年會開始灌錄唱片，問到環球力捧Emme（黃伊汶）一事，栢芝說：「邊個Emme呀？呢啲嘢冇話取唔取代嘅，公司咁多歌手。」
栢芝早前被影到往探陳冠希班，問到二人是何關係？栢芝說：「我哋係好朋友，唔好話我上契，然後就喺度啫住我。」記者欲問栢芝可有看過王菲出入霆鋒家的照片時，她即說：「之前我耳仔有問題，𠵱家眼都有問題。」隨即轉身離開。
此外，譚詠麟談到阿梅與霆鋒的緋聞時，笑言自己與克勤亦有結拜。阿倫說：「我哋重喺廁所放煙花以示慶祝。」問到二人誰才是契細佬？阿倫說：「我做冇所謂呀！每個人有唔同感覺，唔知佢哋（指阿梅與霆鋒）係咪真係結拜啫。」
阿倫得悉阿梅與霆鋒已上香結拜後，他即說：「咁咪好囉，有乜好？佢哋先知，我哋就唔知呀。」
問到阿倫與阿梅相識多年為何未有結拜？阿倫笑說：「我未到水準啩，未到佢要求，我講嘢佢唔聽，佢講嘢我又唔聽。」阿倫謂他間中也會致電霆鋒聊天，但就沒有結拜，他說：「結拜佢咪我契仔？」但阿倫其後又表示不相信阿梅與霆鋒是情侶。
採訪：李珮洳、王連連
攝影：陳慧安
