呢排落雨落雨又落雨，連超級魚友蕭先生都怕帶住老婆仔仔去磯釣太危險，所以決定「屈就一下」，去傳聞「悶局」嘅魚排試釣。點知一釣就讚不絕口，「估唔到咁穩陣，響大風大雨下，魚排都咁定！而且裏面設備唔錯，我哋一家三口收穫重好豐富㖭！」
記者：李玉蘭 攝影：陳智良
ImagePeople：Kiki、Ming（FromImagineLtd.）
老闆阿曾唔係漁民出身，只係個自小愛釣魚嘅超級魚迷，「我係沙田原居民，十零歲時已經去山坑、水塘釣魚，可惜魚穫麻麻！大約十多年前，認識咗榕樹澳居民，一釣就不可收拾，一次魚穫竟然已經係成季總和！朋友好得戚話呢度係天然避風塘，處於紅樹林兼位於內灣，所以魚量特多。
「老實講，近年自己嘅地產生意麻麻，加上政府舊年開始發牌，畀人上魚排釣魚，所以就買咗五萬呎地方，圍住可以聚魚嘅巨形礁石起咗一個Ｕ字形魚排、觀賞魚池、安全欄杆及圍網。」就係因為阿曾同班同事響水上日做夜做，所以佢哋順便做咗一個遊戲房，大廚房及觀星用嘅吊床，設備好似一間簡樸住家，而且重唔介意同熟客朋友分享佢嘅設備。
有十多年釣魚經驗的發燒友蕭先生：「今次係第一次嚟魚排玩，感覺係腳踏實地夠安全，頭先忽然大風大雨，感覺都好定，唔會浮浮吓，絕對適合一家大細齊齊玩番日。呢度嘅設備好足夠，玩到眼瞓重可以問老闆借張尼龍床攤唞吓，好舒服！」而蕭太就覺得呢度嘅魚穫好豐富：「我哋一家三口今日釣咗八斤魚，星鱸打算用嚟燜蘿蔔，紅魚就可以紅燒……，睇怕都要請啲街坊食。」仔仔樂謙更得戚地說完全無難度：「幾秒已經釣到兩條，每條成斤重，玩得好開心！」
「我反正唔識釣魚，真係無耐性學佢哋等運到，索性響繁殖區碰吓運氣。殊不知未夠一分鐘，就有一條五斤重嘅星鱸上釣。老細話響繁殖區內釣走每條半斤至五斤重嘅魚，都一律只收$20，計落認真有着數。」
「除咗可以欣賞珊瑚魚、花面純、五十幾斤重嘅龍躉外，原來重可以坐喺葡萄藤下盪鞦韆。大家搖吓搖吓談天說地，好有新鮮感。」
其實出海釣魚唔一定捱乾糧，畀個貼士大家，只要你嚟多一兩次，同老細熟落咗，隨時有幸試到佢嘅秘製辣蟹、椒鹽瀨尿蝦、章紅刺身、豉油炒魷魚、清蒸石斑等。「我今日好有食神，同班Friends可以食到一餐海鮮餐，我覺得椒鹽瀨尿蝦最好食！」Rebecca開心地說。
(A)大學火車站乘搭綠色小巴807K，途經馬鞍山和西沙，到達總站後，可詢問村民三杯酒碼頭位置，約步行3分鐘便到達。
(B)西貢市中心乘搭綠色的士，前往榕樹澳魚排碼頭，車費約$40。
收費：成人$80，兒童$40，團體另議；在三杯酒或榕樹澳有專艇接載。
地址：西貢榕樹澳魚排編號4076
查詢：91629278