恭喜！恭喜！《蘋果》嘅同事連奪第八屆「人權新聞獎」六個獎，當中囊括咗報章新聞組嘅三個獎，攝影部亦有兩位同事攞咗優異獎。人權新聞獎由香港記者協會、國際特赦組織香港分會及外國記者會合辦，今年有一百八十八個參選作品。
攞咗報章新聞組冠軍嘅，係我哋採訪部踢爆「阿松偷步買車」嘅系列。宣讀獎項嘅大律師湯家驊話，呢個系列雖然唔係所有評判嘅首選，但得到評判毛孟靜力撐，因為記者揭發高官不高尚嘅行為，保障咗市民好寶貴嘅知情權。
呢個人權新聞獎每年舉辦，代表新聞界對保護人權同自由嘅重視，我哋有份攞獎，當然值得高興啦。話時話，各位同事獲獎咁開心，唔知高層會否有表示呢？
《基本法》第二十三條非常困擾香港人，對人權和自由威脅最大，所以今年嘅參選作品，大部份都講二十三條，湯家驊重笑住咁多謝葉局長，話佢喚醒咗香港人對人權嘅關注。
而噚日多個出席頒獎禮嘅講者都表示，對二十三條立法感到憂慮。八方喺呢個開心嘅時候諗起二十三條，都禁不住有一份傷感圍住成個人，覺得好唔舒服。
傳真︰2623-9278
電郵︰
