雖說歐洲足球壇已轉為沉寂，不過法國今夏仍然有兩個國際足球大賽上演，最矚目當然係周三起上演嘅洲際盃，香港收費台重會全程直播；𠵱家喺土倫則舉行緊二十一歲以下錦標賽，有十個國家參與，不過噚日朝出現一個大家聽到都會打個突嘅戰果，就係英格蘭分組賽慘吞阿根廷八蛋。
點解英格蘭輸得咁慘，最大原因係部份主將之前俾撬去打二十一歲以下歐洲國家盃同做大國腳包括神童朗尼；翻查佢哋嘅陣容，發覺成隊波基本上係大球會嘅預備組仔。點似得阿根廷兩大射手喺河床嘅費蘭迪斯同羅沙里奧中央嘅夏里拉，咁睇重呢個賽事；不過兩大足球強國生牯仔對碰，英軍竟然輸得咁慘，就真係有點那個。
西甲球隊馬拉加季尾踢到不知所謂，原來又係錢作怪。話說該隊前鋒D施華爆球隊係唯一一支冇花紅派嘅聯賽球隊，所以佢一定走硬。我求大俠諗唔怪得呢排不斷傳出呢隊波有球員走啦，咁搞法今日佢哋迎戰西維爾豈不是好危？莊家開盤馬拉加主場受讓，唔係冇原因嘅！
早排傳愛爾蘭中場賀蘭特下屆會由葉士域治過檔超聯升班馬樸茨茅夫，點知喺個人條件上傾唔掂，交易拉倒，而最新消息話賀蘭特同查爾頓傾緊。但係，我求大俠唔睇好呢單交易可成事，事關由上屆開始就有球會同賀蘭特斟，次次都衰收尾，睇嚟係賀蘭特冇心走。
美國網球老將阿加斯，日前接受英國《太陽報》訪問時話，睇好英國漢文可以贏到今屆溫布頓冠軍。阿加斯咁講，擺明係畀面英國佬，事關漢文參加過十次溫布頓，最叻都係去到四強；重有佢打咗十年一次大滿貫都未攞過，阿加斯話佢贏冠軍，擺明叫球迷……。
隨住英格蘭及意大利兩地球賽收咧，我哋《蘋果波經》嘅戰果查詢熱線26239888（英意戰果），暫時無用武之地。但係𠵱家北歐賽事風氣似愈吹愈勁，所以呢條熱線喺呢個暑假，為大家提供北歐幾個聯賽戰果，希望各位打去聽到自己最想出現嘅「戰果」啦！
馬拉當拿脾氣唔好就係人都知，而佢個十七歲大私生子亦唔遜色。𠵱家喺拿玻里青年軍踢波嘅小馬拉當拿，由於唔滿意坐冷板，竟然喺練習場發脾氣，重猛鬧會方借佢過橋，以吸引多啲球迷；結果小馬拉當拿俾會方罰停賽。球員最重要就係服從領隊命令同遵守紀律，希望小馬拉當拿經過呢次事件後，可以成熟啲啦！