吳鎮宇同老婆王麗萍前晚約埋一個男性友人去咗銅鑼灣麻布茶房食晚飯，一行三人喺餐廳食咗成粒鐘。
馮仁昭見鎮宇老婆好好胃口，佢哋已經叫到成枱食物，後來重再叫侍應攞餐牌畀佢哋，叫多啲嘢食，睇嚟嗰度啲食物都幾啱口味。見鎮宇老婆全程唔停咁食嘢，佢咁大食，差啲以為佢有咗㖭。
最搞笑係鎮宇老婆口罩不離身，只係食嘢嘅時候先至將口罩拉低到下巴，一停口又即刻戴番，動作好鬼純熟同快捷。當鎮宇唔小心整污糟塊面，老婆好細心咁遞紙巾畀佢，兩公婆鬼死咁恩愛，恨死隔籬。
當鎮宇兩公老婆食飽飽走嘅時候，馮仁昭見王麗萍嘅身形好纖瘦，一啲都唔似有報道話佢似有身孕。問鎮宇幾時做老竇，佢話：「等『沙士』過咗先啦。」
蔡依林噚日朝早喺台北輔仁大學行畢業禮，佢重帶領全校師生合唱校歌，唱唱吓佢忍唔住喊咗出嚟。
之後校長頒發畢業證書畀蔡依林，安慰咗佢幾句，但蔡依林反而喊得重犀利，之後要助手扶佢離開會場冷靜一下，而蔡媽媽都好激動，不停同老公重複咁講：「蔡依林畢業了！」
汪明荃日前為黃耀明嘅新歌《窮風流》MV擔任女主角，阿姐飾演侍應。阿姐每個造型都好正，佢話覺得呢個MV好有意義，而且未來歌星同歌星之間合作會係潮流，所以樂於幫明哥。
阿姐前晚又出席抗非典音樂會，悼念犧牲嘅醫護人員同埋籌款，阿姐喺劉詩昆伴奏下唱咗《給自己的情書》同《勇敢中國人》兩首歌。
羅敏莊早排同男友陳國邦遇到車禍，噚日佢喺鯉魚門廣場出席活動，佢話傷勢好番七七八八，不過胸骨有啲痛，男友嘅傷勢比佢嚴重啲。
經過今次，羅敏莊覺得陳國邦係非常好嘅男朋友，但係暫時冇結婚打算，如果中咗六合彩有一千萬就例外喎。
梁詠琪（GiGi）噚日出席《醫護群英響全城》表演時，行路就住就住，佢話係前兩日拍廣告拉傷左腳大髀內側肌肉。
GiGi重話男友鄭伊健都知道佢受傷，伊健同佢講：「咁你知我平時拍動作片幾咁辛苦啦。」而GiGi𠵱家每日都要助手陪佢去做推拿療傷。
