劉德華除了演藝工作外，亦很熱心投資電影，但年前其開設的天幕電影公司卻使他蝕了四千多萬，後來與中建合作，卻又對簿公堂，有指他失敗的原因是太過信人，問華仔還敢不敢再做老闆？他說：「OK啦，唔好再有partner囉，自己一個人搞晒，唔好為賺錢去做，做啲鍾意做嘅嘢先。好似同陳果合作，或者拍《給他們一個機會》咁，都好開心㗎。」
很多時工作夥伴是由朋友開始，認識後覺得投契才一同工作，雖然華仔曾經誤信他人，但身邊亦不乏有義氣的好友，華仔說：「我同學漁佬，佢做幕後嘅，好friend㗎；重有Simon，佢以前係我司機。我記得有一次我喺調景嶺拍戲，突然有個飲醉酒嘅人嚟收錢，我哋同區議員租晒場，話佢知搞掂咗㗎，咁漁佬即刻call個議員，電影公司其他人都係細路仔，我咪惟有自己同個大漢傾住先。我同佢坐低，拉住佢對手放喺枱面，佢後面重有成十幾人撐住，Simon就擺晒姿勢一個人企我後面撐我，所以我哋後來成為好朋友囉。」
華仔另一好友潘宏彬久未露面，原來連華仔也找不到他，他說：「呢個係奇人嚟㗎，我都唔知佢去咗邊，突然失晒聯絡，所有朋友都搵佢唔到，好奇，真係奇人。」