全國政協劉迺強上星期二喺《南華早報》專欄講基本法二十三條立法，立論大大出乎我哋意料之外，因為劉政協呼籲董特首臨崖勒馬，取消二十三條立法，佢嘅理由係：（一）國安法不斷修訂，成為無牙老虎，衰過現時法例（即英國佬定下嘅法例），要唔要都罷；（二）既然政府唔立法都冇損失，不如順水推舟，宣佈取消，如此一來，董特首必然民望急升，威風晒；（三）民主派叫做贏咗，實際上係輸咗，一無所得。
劉政協嘅推理，好似好合理，但我哋一時之間追唔上立法形勢，真係唔知劉政協講得啱唔啱。呢樣唔緊要，最重要係劉政協何出此言？出完聲，董特首都係唔會聽嘅，所以劉政協亦講明董特首唔會做，肯定一意孤行。
據官場人士講，特首希望完成任務，留下一啲legacy。任務就係完成二十三條立法──不論社會代價及政治後果，總之要向中央交代。Legacy就係教育，搞唔掂全面教育改革，都要將大學制度恢復中文大學原有嘅四年制。港大王賡武校長喺一九八六年曾發表文件，建議港大三改四（其中一個理由係港大新生英文唔掂），點知港英唔聽，重順手迫埋中大四改三。董特首認為大學四年制與中國內地、台灣、美國銜接，乃是正道，所以要求大學三改四，即使政府唔夠錢，亦要諗辦法。左丁山素來支持三改四，所以喺呢件事情上，讀者突然見到左丁山擁董，唔好驚奇！