屬牛的劉德華一向予人勤力之感，他苦幹多年，現已名成利就，還要接拍《瘦身男女》及《大隻佬和尚》兩齣「苦差」電影，每日要花數句鐘化妝，夏日炎炎要黏數十磅假肌肉，何不去享受人生？
華仔說：「我之前去電台做訪問，撞到個心理醫生，佢又係咁問我，好多人都咁問，我真係冇諗過捱呢個問題，我唔覺得自己好搏，又唔覺辛苦。唔係話享受先叫休息，花費好豪就叫高尚，我拍《大隻佬》肉體上係好辛苦，但好開心，我只係想做一件事係覺得值得嘅。」
那麼華仔現在工作追求的是甚麼？他說：「我真係冇諗過重要追求乜嘢。好似做肥佬（《瘦身男女》中的角色），如果有人見到然後會讚香港電影都做到呢啲，我就好開心。」
當年梁朝偉在《春光乍洩》的角色，本來由華仔飾演，後來卻不了了之，華仔說：「唔係我唔做，我都唔知點解冇咗。當時王家衞搵我，我叫佢覆我要拍幾耐，點知佢冇咗下文，到部戲開咗先知。」那會否再跟王家衞合作？華仔說：「佢再搵我都係嗰個條件，要話我知幾錢同拍幾日，就係咁多，最低限度我要知拍幾耐，我唔可以為一部戲，之後啲嘢唔知點安排。」
