恒指在9600至9700水平整固一輪，唔落得，又再升過，噚日成交且大增到122億元，高收9855，大升118點，今個升浪，恒指好大機會先上試10000大關，然後才調整。
國企強勢畢呈，基金同大行沿途護航，鋼鐵同石化股嘅升勢最全面，其中以重鋼（1053）最勁，高收1.71元，大升8.2%，馬鋼（323）亦有7.1%進帳，石化股繼續由上海石化（338）做龍頭大哥，收1.63元，升3.8%；早輪推介嘅鎮海煉化（1128）升勢一發難收，搶上2.95元，再升5.3%，另外吉林化工（368）有大動作，收0.97元，升6仙，成交接近7000萬股，聞說有堅料，要昅實。
國企揚升，紅籌亦發力，其中最值得留意係天津發展（882），噚日成交1400多萬股，係兩年來的最高紀錄，此股在1.7元至2.1元整固咗大半年，今次破位而上，初步目標係2.5元。係人都知，成交走在股價之前，以津發嘅表現，牛咗咁耐，而突然間又出現咁強嘅動力，呢個升浪絕不簡單。
事實上，津發今年有好多大動作，第一就係公司業務重組，第二就係分拆項目上市，噚日股價同成交都有異動，主要就係有消息，話重組同分拆都接近拍板，月內就會有料到。
重組方面，集團會出售虧損的非核心業務，而貿易業務蝕本，會優先出售。分拆方面，第一項要做嘅係公路業務，如無意外，第3季可上市，目標係集資3億元，至於港口和釀酒業務，亦會陸續分拆，估計04年可完成。
集團旗下的公路項目業績有進，今年首季車流量比去年同期增加20%。公路一向係津發盈利的主要來源，02年獲得營運盈利1.49元，上市的資產包括外環東路86.7%及津濱公路24%權益。津發往績PE8倍，而公路股平均PE約13倍，分拆可令公路項目更能反映實質價值，亦可提供特殊項目收益。
重整及分拆後，估計津發03年度（12月年結）盈利可達2.5億元，每股盈利37仙，以保守PE8倍計，股價已可見3字頭。津發現價可以短線投機，亦可作中線投資，有機會賺3至4成。
郭兆誠