八方前日講過新世界發展董事總經理鄭家純俾大狀寸佢英文唔掂，噚日上演下集。
純官噚日繼續為十三年前同新鴻基證券前主席馮永祥單糾紛作供，代表新證嘅大狀M.Strachan要純官將成呎厚嘅法律文件逐張睇清楚，逐點問純官記唔記得，加上要繙譯，搞到庭上各人猛打呵欠，連暫委法官杜溎峰都忍唔住叫停，話繙譯譯唔到。
代表新世界嘅資深大律師陳志海即時發難，彈起身指住Strachan話：「其實大家要用咁多時間繙譯，唔係鄭先生嘅問題，係因為Strachan唔識廣東話，否則我哋可以用廣東話進行。」
純官嘅大狀好友王穎妤接力反擊：「我諗你唔係好熟香港法庭情況，證人用廣東話作供係好普通嘅事，我唔認為鄭先生要俾你用粗言穢語質疑，請尊重證人。」兩人反應咁激，Strachan當堂嚇窒，唔記得反駁話自己只係詞鋒尖銳，並無粗言穢語，否則法官大人都唔會放過佢。
（圖）王穎妤
傳真︰2623-9278
電郵︰