近年，電單車熱潮席捲香港，就連本地足球圈亦有多名球員當上「鐵騎一族」。他們有的為潮流、有的貪方便、有的愛速度、亦有因為球巿不景，放棄以前月花數千元的四驅年代，轉用每個月只需數百元的電單車代步，自得其樂。 圖?文：李勇明
由私家車轉揸電單車的潘文迪，原先是綿羊支持者，後來覺得ET-8的馬力不足，最近才換了一架時速可達二百公里的本田Super-four，追求「極速之旅」。
「以前揸私家車每個月要四、五千蚊，而家轉揸電單車後，每個月只係八百蚊，對於我哋呢班成日面對減薪嘅足球員真係幫助好大。」即將轉投晨曦的潘文迪說。
由之前綿羊仔，到現時轉為馬力較大的本田Super-four，「阿迪」轉車原因並非想像般追求速度；相反，有三年電單車經驗的他認為「大車」比「細車」更安全，他說：「記得有一次喺高速公路，我架綿羊仔俾架巴士同貨櫃車一前一後夾住，想抽頭走但架綿羊仔唔夠力，真係好危險。自從嗰次之後，我決定換架馬力大啲車，始終大車畀我嘅安全感多過綿羊仔。」
「我賣咗架ET-8，用呢筆錢買咗架二手Super-four，加多千零蚊噴油，襯番我個頭盔藍白色。我希望我架車唔同出面街車，辣得嚟睇落都幾斯文。」「阿迪」續說。
本身擁有「掃把佬」跑車的司徒文俊，選擇轉做綿羊一族，除因為電單車方便快捷和便宜經濟優點吸引外，最重要是因為近年一股綿羊熱的興起，令「司徒」立即轉投綿羊懷抱。
「我上年八月開始報學電單車，好好彩一次過Pass，全期學費大約五千蚊左右。攞牌之後，大約三個月前再用五千蚊買咗呢架二手綿羊PX200，連埋噴油同換零件，大概用咗八千蚊落架車度；再加埋保險牌費，加加埋埋用咗萬五蚊就可以做綿羊一族。」司徒文俊說。
因新牌仔需在車上掛「P」字牌的「司徒」，認為揸綿羊仔有一份自由自在感覺，他說：「又唔使塞車，泊車又方便，每個月只係幾百蚊已經可以周圍去，呢樣就係私家車同電單車最重要嘅分別。」「我鍾意呢架車，因為佢個款夠經典。我重特登將架車噴上杏色同棕色，襯番我個頭盔。未來我希望可以儲夠錢，喺外國訂架全新嘅復古車，價錢大約四、五萬左右；跟住我諗會幫架車裝番個鋁架，後面擺條士啤胎就型到爆。」
