衞生署署長陳馮富珍早排日日「四三零」記者會，同班記者「產生感情」，𠵱家有着數都會預埋記者。
噚日香港旅遊發展局接待咗近二百位來自歐洲六國嘅華僑，宣傳香港旅遊同商貿，重請咗陳太去講香港抗沙士嘅情況。陳太話，今次嘅天災係政府控制唔到嘅，但政府嘅處理手法就好反映到佢負唔負責任，佢順便讚吓自己嘅衞生署，話日日都召開記者會同市民負責㗎。
一班來自荷蘭嘅華僑重好有心，特登籌咗四十萬，買咗八千張餅券送畀醫護人員。陳太喺阿姆斯特丹華商會會長文俱武手上接支票時話，咁多餅券佢哋都食唔晒，其實記者喺沙士一疫上一樣不眠不休咁工作，不如分埋畀佢哋啦。
難得有政府高層欣賞記者嘅辛勞，八方在此多謝晒陳太。
（圖）陳馮富珍（右）借花敬佛，將阿姆斯特丹華商會會長文俱武（左）同會員送畀醫護人員嘅餅券，送埋畀記者朋友。 徐岱靈攝
傳真︰2623-9278
電郵︰