港股走勢果然出現小突破，噚日好友午市發力，恒指再升118點，收9855。恒指全周升161點，升幅1.66%，連續第7周上升，趙飛雲好有興趣睇吓恒指下周能否連升8周，平99年10月中連升8周的紀錄。當時牛氣沖天，今時當然難比。
國企股近兩日熱炒，趙飛雲既然失先機，惟有睇戲並無趁熱鬧，其實今次國企升勢重勁過恒指，以鞍鋼（347）為例，昨日收市價1.81元，已升破01年6月1.75元雙頂高位，走勢非常強勁。
按過往慣例，國企急升之餘，應會帶動紅籌造好，中信泰富（267）國內項目套現逾60億元，但管理層表示不會派特別股息，股價由高位回落，昨日微升0.05元，收15.05元，現價往績PE8.5倍，應有追落後概念。若下周真係炒完國企炒紅籌，中信可短炒一轉，15元附近可上車，目標16-16.50元。
另外，冇「上海」恐懼症的讀者，亦可留意上海實業（363），經過近1個月橫行後，噚日出現首支大陽燭，以勢論勢應未升完，有機見12元水平，炒賣以上兩股當然難過份憧憬，但勝在安心瞓得着。
倉內海域（1220）連續兩日整固，正如之前提過，10日線未回升前，升勢會受壓抑，可繼續持有，待10日線回升後則伺機加注。另一隻意科（943）則升1仙，收0.32元。
意科周二復牌，以裂口升破0.30元阻力後，近兩日走勢穩步向上，可繼續持貨上望，較佳的形態是守在0.30元上逐步形成新的上升通道。
趙飛雲