做藝人紅唔紅得起真係靠一命二運三風水，有啲才能與外形兼備嘅可能一世半紅不黑，有啲樣樣嘢都唔想做但就勝在一世夠運。好似窪塚洋介嘅前女友國分佐智子，就係後者嘅最佳代表。
大家千祈唔好誤會我羅拉踩國分，佢自己都話以為會高中都畢唔到業兼做死一世煮飯婆，點知機會偏偏一次又一次咁送上門。
國分早兩日出咗本寫真集《月刊國分佐智子》，佢喺香港冇乜擁躉，但聽講日本就好快賣斷貨，唔少男fans話佢嗰種鬱鬱寡歡、看透世情嘅表情好吸引喎！
唔講唔知，返返吓學俾星探發掘入行嘅國分，初初係做dancer嘅，有日突然俾事務所叫咗佢去拍水着相。國分好坦白咁講：「我好憎影水着相，因為要對住一大班人展露身材，而我喺呢方面對自己好冇信心，但諗番轉頭，就當係轉為做演員嘅踏腳石囉！」
至於感情方面，國分就話唔想再提窪塚同其他舊愛喎！佢好感慨咁話雖然有好多男人主動追佢，但當佢投入真感情嘅時候，就會被拋棄。所以話呢，有運行都要睇自己識唔識把握嘅。