前日提過嘉域集團（186）有芬佬接貨，噚日隻股表現脫胎換骨，非常醒神，大升5.53%，收10.50元，創1年新高之外，成交重大咗好多，有成2492萬元。
經紀黃話，芬佬基本上重未收夠貨，所以嘉域升勢仍可持續一段時間。小初就覺得嘉域股價銀碼大難炒，等股價上升等得好辛苦，但經紀黃就唔同意，佢話好似裕元（551）咁，當日1拆2時，股價仍然十幾元一股，但話咁易已經升上21至22元水平，所以小初唔應該歧視大價股。
小初覺得，工業股炒到依家已經近水尾，似乎追唔過，家陣國企股異常神勇，真係冇消息都可以炒一餐，兼夾成交量夠大，唔怕好似啲莊家股咁，買咗驚甩唔到身。小初噚日炒國企股玩篤手指，炒得非常過癮。當然，篤手指呢類高危活動，唔係單靠膽大，功力唔夠及水源唔足，真係咪立亂玩。
慕容小初