安永會計師事務所（Ernst&Young）在六月十日賣廣告，發表聲明指ＩCAC（廉政公署）拘捕「安永」合夥人是毫無理由，「毫無根據及錯誤理解的」。記憶所及，廉記拉人，從來冇涉嫌人物嘅僱主或公司高調公開呼冤嘅，睇嚟廉記與安永呢場官司有得打。
「安永」係四大會計師?核數師行之一，係「騰達智能」科技上市時嘅核數師。安永核數就叻嘞，可惜唔識中文校對，咁大段聲明指責廉記，廣告費唔平㗎，竟然寫錯字，將「廉政公署」寫成「廉正公署」。喂！廉政公署可能係公正廉明，但招牌就係「廉政」，唔係「廉正」呀，安永班大佬！安永聲明嘅第二句：「對關於騰達智能科技有限公司及安永合夥人的拘捕」，文句不通：第一，廉記點可以「拘捕」公司？第二，中文好少寫甚麼「××的拘捕」，而係寫成「拘捕××一事」。
上述句子當然係從英文譒譯過嚟嘅，英文原文係ConcerningGlobalTrendIntelligentTechnologiesLtd.andthearrestofapartnerofE&Y，其實可譯成：「有關騰達智能科技有限公司及拘捕安永合夥人一事」，咁就通順得多啦！
左丁山並非故意挑剔；平時替左丁山做開譒譯嘅電腦Ｊ（此君雙眼望住英文稿，左右手就打中文入電腦，夠晒快）睇完安永聲明就笑哈哈，打電話畀左丁山：「平時你成日彈我譯得唔夠好，唔小心，你睇吓人哋世界四大會計師行都係咁嘅水平咋！」因此順手寫一篇呃稿費。