有無諗過去完餐廳品嘗完一道美味菜式後，自己都可以返屋企照辦煮「餸」？有無諗過唔使錢都可以跟高級餐廳大廚學整幾味貴價菜式？呢兩個諗法唔算妙想天開，因為靚女伍詠薇都有同樣嘅想法，最近佢更加付諸行動，去咗一間心水西餐廳一飽口福之餘，重向餐廳大廚拜師學藝，唔想再做非典型煮婦咁話，誓要征服釀雞卷同埋煎頂級牛扒！成唔成功？睇吓就知！
記者：黃婉冰 攝影：陳陶鈞
伍姑娘不諱言自己其實唔識煮餸，絕對係一名非典型煮婦，「我好極端，淨係識煮啲好簡單嘅菜式，好似蒸魚、蒸餸，去超級市場買料煲湯，但係又會識一、兩味較複雜嘅小菜，好似阿媽教嘅咕嚕肉，對中菜我會有sense啲，但對於煮西餐，可以話係零，完全唔識。」
她自言同老公口味一樣極西化，但對西餐只限於識食，完全唔識煮，極其量都係焗吓蒜茸包、煎薄餅，簡簡單單整一餐Brunch，再複雜少少都唔曉，「想去學又怕醜，好多時只可以向識得煮餸嘅朋友偷師，但機會唔多，所以到𠵱家依然得個想字，其實我最想學煮係西菜嘅MainCourse，好似豬扒、雞扒、銀鱈魚，就咁煎唔係好難，但係要再配合其他配菜、汁醬煮成一道西菜就唔易。」
於是伍姑娘去咗一間心水西餐廳，直搗大廚嘅私家重地─廚房，誓要學有所成，下山返屋企煮番餐畀老公歎，我哋即管睇睇佢嘅學藝過程同成績又如何！
帶子蟹肉青瓜釀雞配香茄蒜汁是大廚的自創菜式，由蝦膠釀雞肉演變過來，將內餡的蝦膠改為帶子蟹肉，帶子同蟹肉鮮味加上雞的濃郁肉香，兩者配搭得宜，互不搶味，再配以酸香的香茄蒜汁，三者味道夾得啱啱好。
材料：
去骨雞髀肉1塊
新鮮帶子4粒
蟹拑兩隻
紅椒1隻
青椒1隻
黃椒1隻
洋葱少量
青瓜少量
淡忌廉2茶匙
鷹粟粉3茶匙
鹽、胡椒粉、雞粉適量
新鮮香草Tarragon、Thyme草適量
汁料：
鮮番茄4個
淡忌廉適量
白酒少量
蒜茸少量
紫蘇葉少量
大廚心得：「要煮呢道菜，秘訣在於手勢，由捲雞肉到紮成雞卷都要力度適中，否則未煮已經走餡。」
做法：
1)蟹拑拆肉，將帶子肉洗淨。青、紅、黃椒、洋葱、青瓜切粒，用刀將材料剁成茸，加入鹽、胡椒粉、雞粉、淡忌廉及鷹粟粉調味攪勻，最後加入其他配料，拌勻後再用力撻幾次令帶子肉變得爽滑。
2)雞髀肉洗淨後將較厚的地方片薄，撒上少許黑椒、鹽及Thyme、Tarragon等新鮮香草作調味。
3)雞髀肉調味後，將帶子茸鋪在雞髀肉上，剛好可以鋪滿半隻雞髀肉的份量就可以，鋪好後用手輕輕將帶子茸堆成圓拱形。
4)將雞髀肉連同餡料捲起，再用白棉繩將雞捲繞成一圈圈紮實，紮時記得切勿過度用力，紮好前面再反到後面將繩穿過所有圈，然後綁結紮實。
5)將雞肉紮實後，先用平底鑊將雞卷煎至外表金黃，放入焗爐以180度焗八至十分鐘。番茄蒜汁要先將蒜茸、番茄、忌廉、白酒一同打爛，放入鍋內煮十至十五分鐘左右，再加入少許紫蘇葉吊味，淋在雞卷上便可。
一塊牛扒賣到二百幾蚊，其味力何在？D.A.牛扒會在劏好後吊在只有零至四度嘅特製冰櫃內足足21日，牛扒經此一吊，血水可以keep得住，肉味亦得以保存，同市面的急凍處理截然不同，加上用特製烤爐燒過，肉汁豐富，肉質鬆軟，配合大廚落重料熬足四日的自製牛扒汁，更能襯托出其獨特牛味。
材料：
牛扒1塊(8安士)
鹽少許
黑椒少許
大廚心得：煎牛扒好似好簡單，但其實一樣要有技巧，要留住肉汁火要夠猛，用高溫將牛扒表面封住，令血水同肉汁無得走。
做法：
4)燒完四邊後可以開始燒其中一面，燒時火候一定要夠大。燒的時間因應生熟程度而定，好似伍姑娘咁鍾意食八成熟，每面燒約一分鐘便可。每面燒完第一次後，要再反轉以相反方向擺放再輕輕一燒，就可做到一格格的烤紋。
5)喜歡濃味的話可以伴以汁醬，大廚話可到西式大型超級市場購買燒汁粉，用水開成汁再煮熱就可以當牛扒汁用。
煮得咁辛苦，當然要試試自己嘅首個傑作，只見佢食完第一啖，即時表露一臉滿足表情，就知效果不俗，「我以為雞肉會好嚡，但呢個雞卷好滑，滑到好似塊面咁滑，入面啲香草出晒味，個汁好sweet，同帶子餡、雞肉好夾，但係捲起時較難，好考功夫。個牛扒熟度啱啱好，肉質唔會過腍，幾結實，好有口感，食落係食得出完全同出面一般牛扒唔同，個汁好香，同牛扒好配合。但係個廚房真係好熱，我好佩服班廚師。」連大廚都有讚無彈，睇嚟第一次成績都唔錯。
矜貴的極黑豚豬原籍日本，每隻都會運到美國以新科技配合特別的飼料飼養，所以肉質會較普通豬肉鬆化同多肥膏，肉味亦較濃。大廚用香辣粉醃上一個鐘，味道辣辣哋，開胃又不膩是其最大賣點。
呢間伍姑娘嘅心水餐廳主攻美國牛扒同菜式，美式風味除了在菜式上感受得到，牆上的懷舊美式掛畫、古老收音機、擺設，每一個角落都突顯出美國當代餐廳的風格。
店名：Mr.Steak（28021128）
地址：灣仔港灣道28號1樓三里屯10號舖
營業時間：中午12時至晚上11時半