恒指唔覺唔覺又升118點，上到9855。好多人都記得上周四午市，忽然散落去，話係單日轉向，唔多對路，結果唔係嗰回事，恒指𠵱家撲向一萬大關。
有經紀行友人話，好多行家啲散戶客仔，以冇乜揸貨或者空期指為主。若然真係咁，則個市未係時候回頭，因為傳統智慧係散戶經常會做大戶嘅點心。
散戶唔係注定要做點心，亦都好多精明嘅散戶。不過，大市資金的確好多，睇吓啲芬佬買貨如狼似虎，睇吓摩根大通周時要呈報，邊隻邊隻股票又揸多咗幾多，就清楚啲錢係咁嚟。
𠵱家咪手多，見啲Put輪散成咁就買入，就算唔睇好都咪睇淡住。若然覺得個市上去冇乜水位，可以畀啲耐性，等回吐時先至買啲Call輪。
昨日升市中，長和系畀標普降低信貸評級，跑輸啲，長實（001）同和黃（013）都只能守住前市水平。不過降低評級嘅嘢，只會影響一陣，如果有人要面子，第日股價彈起上嚟，可能更加犀利。
長實主角Call輪9764收38仙，升1格，和黃主角Call輪9765收30仙，亦升1格，都冇因正股唔升而冇進帳，代表正股後市睇好。下星期可以諗吓啲長和Call輪。
章盛