特首董建華＋律政司司長梁愛詩＋保安局局長葉劉淑儀，你估結局係點？係法律界罕有地上街遊行，各界罕有地呼朋喚友七一上街去。
重有好嘢，大律師公會、港大法學院以及城大法學院，今日亦罕有地請晒全世界權威嘅國安法同人權法專家去港大，一連兩日開壇討論二十三條嘅立法問題，歡迎各界參加。
趁住噚日《基本法》二十三條關注組開記者會，吳靄儀同余若薇大賣廣告，話啲講者點猛料，好似來自劍橋大學嘅Dr.ChristopherForsyth，吳余兩人都對佢大力推介，稱佢為行政法嘅祖師爺，佢嘅著作係法律系嘅同學都讀過，由佢講禁制組嘅上訴程序係咪太離譜就最適合不過。
其他講者重有《六四真相》一書嘅編輯PerryLink林瑞培，佢今次專誠嚟講失去新聞自由對一個社會嘅影響，Perry話見過香港喺八九年民運期間報章百花齊放嘅情景，但一兩年前重訪香江，發現新聞報道已大不如前。
今日剛好撞正立法會最後衝刺，法案委員會開全日會逐條審議，咁既然講乜都唔聽，班法律界同民主派議員實行唔睬葉劉，統統去晒港大。
另外，李柱銘會以傑出港大畢業生身份喺黃麗松堂演講，有興趣嘅可以去聽埋。
傳真︰2623-9278
電郵︰