發展商賣樓通常都各有各忙，各自部署樓盤銷售策略，難得聚首一堂。
噚日中原地產就搞咗個盛大嘅記者會，邀請七間發展商，齊集中環麗嘉酒店搞頒獎禮，慶祝中原地產喺元朗綠庭園、東涌海堤灣畔同埋將軍澳中心嘅推銷，做到非常好嘅成績。七間發展商嘅賣樓部要員雲集，場面哄動又熱鬧，陣容咁鼎盛，中原幾乎總動員招待佢哋，不敢怠慢。中原老司陳（陳永傑）重話，入行二十幾年，都未見過咁熱鬧喎。
所謂一分耕耘，一分收穫，中原喺綠庭園同海堤灣畔都促成唔少成交，雙雙獲發展商獨家提升佣金跳至2.15%，皆大歡喜。至於將軍澳中心，就攞第二次獎嘞，喺上個月20號到今個月9號，中原首先做滿四十單，順利贏得三十萬獎金。
𠵱家經濟咁差，人人都十分珍惜腰間錢，好似去商場買嘢，會睇吓有冇泊車優惠，有啲重計埋邊個場嘅免費泊車時間長啲，用到盡。
蘭西重見過有人喺商場問啲買咗嘢又冇揸車嘅人，攞購物單據用。商戶為取悅客人，重會將發票開大個價錢，等個客可以安心慢慢逛。喺今日咁嘅環境，商戶咁做，無非都係想做多啲生意啫，商場大業主若知道呢個情況，唔知有乜感想呢？
利記將成立一支為數一百人嘅「利嘉閣宣傳大使」隊伍，主要負責推廣新盤、派傳單、做問卷調查等，稍後重會幫手做花車巡遊同路演。
公司形象攸關，揀選呢班宣傳大使都有幾個要求。一定要開朗、有幹勁同埋形象健康，年齡不限，中五程度，月薪五千蚊，期間重會有培訓，有興趣可以考番個經紀牌，轉任前線代理。𠵱家已經請咗二十人，第一個試行嘅樓盤就係長實朗逸峯。
長和系一手新樓同貨尾大舉出擊，記者會多到記者都幾乎吃不消。好似東涌映灣園今日除搞「映灣園HelloKitty慈善嘉年華」，第二期映濤軒示範單位重同日開放畀一期買家睇㖭。
呢個面積一千二百零一方呎H室示範單位，四房兩廳連主人套房設計，客廳附一個四十二呎環保露台連工作平台，同時又有一個一比一模型賽車嘅小朋友睡房，以及以「啦啦隊」為主題嘅女仔睡房。
示範單位重放咗個養住水母嘅大魚缸，，發展商話可以展示水母嘅「能屈能伸」跳脫泳姿，咁買家又使唔使「能屈能伸」呢？
蘭西
電郵地址：