碧咸轉會新聞無日無之，英國嗰邊嘅報章梗係日日大「做」新聞啦！但睇還睇，都唔好每段新聞都當真，因為有啲轉會條文真係好誇張無聊，亦有啲都幾搞笑㖭！
好似《太陽報》咁，就話「碧咸準買家」之一嘅AC米蘭，準備畀一百萬鎊舒夫真高，叫佢讓番件「7」號球衣出嚟畀碧咸。唉！舒夫真高呢期喺AC米蘭得寵，叫佢讓件衫出嚟咁無FACE？搵鬼信咩！
另一篇《鏡報》報道就話，碧咸已經秘密問咗皇馬十幾條問題，當中包括有冇正選踢、去到踢咩位等等，最搞笑係問皇馬：「可唔可以簽埋我個好兄弟加利仔呀？」
至於英國廣播公司BBC，佢哋就披露咗皇馬已約實碧咸代表係呢個月二十三號會面，呢段消息起碼有個日子，我就覺得比較可信！
西班牙中場哥迪奧拿宣布離開布雷西亞，返巴塞幫會長候選人巴沙特拉票。可能有人覺得佢呢兩年發展唔好，兜個圈要返巴塞真係欷歔。實情係如果巴沙特當選（佢係大熱門），哥迪奧拿就會被委任做球會體育總監，等同皇馬嘅華丹奴，位高權重，前途一片光明。
飛燕諾前鋒雲荷當決定唔同球會續約，重希望會方掛牌賣佢時唔好開價多過六十萬鎊，可見佢離隊心切。雖則佢三十有三，但仍夠「食」力，又係死球專家，如果真係少過六十萬鎊就超抵。淨係派佢踢吓後備射吓罰球都爽啦，唔怪得英超嘅伯明翰即刻話有興趣啦。
兩年前巴西響洲際盃踢得衰，教練李奧烏紗不保。事隔兩年，彭利拿，又係因球會唔放人派唔到強陣出征。不過佢對今次人腳好有信心，重提番友賽大勝尼日利亞：「𠵱家有邊隊坐完二十個鐘頭飛機，即刻數到尼軍三球？」名牌教練即係名牌教練，我求大俠今屆實撐巴西。
ESPN同STARSports今個禮拜唔會直播西甲，但我求大俠啱啱收到好料，三色台決定聽晚深夜直播切爾達主場對皇蘇嘅爭標大戰；如果今個禮拜重未定到邊隊捧盃，三色台下個禮拜再直播埋煞科關鍵戰，咁廣大球迷就抵捱眼瞓睇好波啦！
米高佐敦俾舊情人告欠畀五百萬美金冚口費單案噚日終於有結果，法庭指呢個只喺兩人之間嘅口頭承諾，冇法律嘅約束力，所以「波神」今次唔使大破財囉！其實，「波神」呢筆風流帳發生喺九○年間，之後女方重有咗佢嘅骨肉，點知經DNA化驗後證實經手另有其人，唔怪得「波神」只肯畀二十五萬冚口費，打死都唔肯畀多個崩啦！