夏天一到，個個女仔都嚷着要減肥，但成功例子卻寥寥可數。要減磅，有人會大灑金錢、有人要忍口節食、有人會狂做運動，究竟邊樣最有效？今次我哋請來兩位成功減肥的個案，睇吓佢哋有乜計！
由細至大都係「肥底」的Maggie，中一時體重已達140幾磅。在短短七年間，試過無數的減肥方法，不過多數失敗而且副作用多。
減肥的人點會未試過做Gym，做得Gym多，雖然個人精神咗、健康咗，但可能方法不正確，搞到一身肌肉，變到大大隻，嚇到唔夠膽再做。
Angel同樣是減肥的超級Fans，由細肥到大，體重都維持在130磅左右，除了減肥藥未試過外，很多坊間流傳的減肥法都試過。
試過全日齋飲水，諗住減到肥，飲完第二日就覺得個人好腫，塊面腫不特止，連對腳都腫腫哋。
自認懶鬼，邊瞓邊瘦身是我心目中最理想的方法，不付出勞力便欲收成正果，這並非奢望，只要你有錢便能如願以償。以古法穴位通淋巴及彩光儀器協助下，Maggie在短短個多月的時間由原本136磅減去16磅，距離目標的110磅，還有10磅贅肉。雖然通淋巴令身體又痛又瘀，卻無損其堅毅的決心，繼續付出金錢殲滅脂肪。
年齡：20歲
體重：136磅→120磅
腰：32吋→27.5吋
臂：12吋→11吋
大腿：21吋→20吋
胸圍：36吋→36吋
下圍：38吋→36吋
14磅肉話多唔多，話少唔少，相對上年聖誕最「巔峯」時，現在的Maggie着小背心起碼都算見得吓人。「當時在酒吧做陪酒，經常要劈酒，劈到個身好似吹波咁脹，條腰有成30幾吋，就算天氣唔係咁凍，都日日着住厚褸遮住啲豬腩肉。雖然男友無講出口，不過我自己就開始頂唔順，所以決心重返減肥戰場。」
之前減肥減得好辛苦，今次決定試吓纖體療程。因為費用都幾貴，為咗慳呢筆錢，平日只會襯減價買叮叮食品當午餐，衫褲鞋襪都會盡量少買，雖然慳得好辛苦，但見到自己一日瘦過一日，都覺得好值得！
「第一次做完通淋巴後，我度過每邊手臂大約減了2cm，條腰差不多瘦了4cm，最勁係個胸竟然無縮到。」做咗幾次後，Maggie最開心係竟然着得落男友之前送給她的小背心，「以前着唔落，𠵱家着上身都唔覺得肥。」
個人體驗話你知
全個纖體療程以古法穴位通淋巴和速瘦纖體儀為主力賣點，通淋巴用人手按摩穴位，以疏通全身的淋巴，將體內的毒素及脂肪排出體外，再加埋速瘦纖體儀的彩光機，打散身體的頑固脂肪，Maggie精選了幾個最深刻的過程同大家分享。
人手通淋巴
纖體技師先搽香薰油，然後用人手加氣功按摩穴位，當按到塞塞地的淋巴時，便會覺痛。唔好諗住痛就唔按，其實愈痛即係淋巴愈塞，就愈要按，長達一個鐘頭的按摩，真係痛都要咬住嘴唇死忍呀！
敷辣椒膏似抱火爐
通完淋巴重要敷辣椒減肥膏，敷完後再用保鮮紙「焗」15至20分鐘，「我啲皮膚較薄，敷5分鐘已經㷫到好難頂，要即刻拆保鮮紙，頭幾次啲保鮮紙重黏了些黃色的油，技師話係脂肪，覺得好核突但又好開心！」
纖體儀打散脂肪
瞓在床上技師會貼上高頻震動磁貼，再根據脂肪分布以調校彩光的強弱，以打散體內的頑固脂肪。「做彩光時暖笠笠，每次都忍唔住大覺瞓，不過最過癮係貼了磁貼的部份，真係會有做完運動攰攰哋，帶點痠痛的感覺。」
邊度有得做？
《良心製藥》自然科技保健豐胸修身中心
查詢電話：25126666
療程收費：古法穴位通淋巴和速瘦纖體儀（各8次）
＊優惠價至6月30日$12,888
以做運動而成功減肥的人，最令我敬佩，因為沒有相當毅力、體力，往往會功虧一簣。原本130磅的Angel，為了給遠在外國的男友看到最佳形象，每日6點鐘就起身跑步，持續了個多月，已減去20磅肥肉，這份毅力連我亦不禁學董太講：「佩服！佩服！佩服！」
眼前的Angel帶點徐濠縈影子，意想不到嬌滴滴的她，一句「我大個女要靚呀！」，加埋要畀個瘦樣男友睇，便進行地獄式減肥。「每朝返學前都會落公園跑45分鐘，風雨不改，初初跑唔習慣，跑咗20分鐘，腳仔痠外，連個人都散晒，返學重攰到無心機聽書。」
年齡：20歲
體重：130磅→110磅
腰：30吋→26吋
臂：11吋→10吋
大腿：19.5吋→18吋
胸圍：秘密
下圍：36吋→34吋
不過做幾多運動都好，最慘係愛食零食的Angel間中會忍唔住口。「朱古力、薯片、雪糕可以話係生命的原動力，好多時我一見到薯片都忍唔住口，間中我都會放縱一下，勁食零食同打邊爐，暴食一日，每次都好內疚。有時媽咪都會提我，要我唔好食咁多嘢，佢重專登煮啲清淡啲嘅食物畀我食。」
近日Angel發現跑步的後遺症，就係小腿變粗，開始由跑步轉為跳繩。「咪以為跳繩會舒服過跑步，其實一樣咁辛苦，跳幾分鐘已經頂唔順，有時重做埋Sit-up，做到幾多就做幾多。」
減肥戰績 屢敗屢試
戒澱粉一吃反彈
之前聽人講戒食澱粉質食物，瘦就真係瘦咗，不過個人無嚟精神，又成日覺得肚餓，當你一食番澱粉質的食物，體重就即刻反彈。
記得細細個第一次學人減肥就係去睇西醫食減肥藥，方法雖然簡單，不過食完後心跳手震樣樣齊，連行路都覺得腳震震，最慘係個心跳到瞓唔到覺，副作用太多，但又唔係減得好多。
試過有一段日子，每日都食好少嘢，幾日後就有厭食症的初期反應，見乜都唔想食，即使食都係食乜嘔乜，後來屋企人勸我食流質食物，先至慢慢好番。
食蘋果愈食愈攰
好多人都試過食蘋果減肥，我試過一日食4個蘋果，維持咗幾日，嗰幾日好餓唔在講，最大問題係食到無嚟精神，個人攰到唔想郁。磅數當然跌咗少少，不過食番嘢就彈反轉頭。
飲減肥茶最方便最簡單，不過就屙到飛起。朝早飲完，夜晚就一定屙，人就真係瘦咗，不過個人就覺得好乾。
做運動之前都試過搽減肥啫喱，不過搽咗幾支都無料到，真係嘥時間又嘥錢。