陳慧珊（Flora）與陳豪合作後緋聞不絕，早前陳豪拍婚紗廣告選角起風波都牽連Flora，但Flora仍十分支持和信任陳豪。昨日Flora出席無綫新劇開鏡拜神儀式力撐陳豪說：「唔介意一齊工作，有錢齊齊搵，我哋有嘢做都會互相介紹。」
陳慧珊、劉松仁、周麗淇和葉璇等昨日在將軍澳電視廣播城出席王心慰開拍的新劇開鏡拜神儀式，劉松仁和Flora在劇中飾演情侶，並會有很多談情戲份。
由於劉松仁是前輩，與他拍談情戲令Flora感到一定難度，但劉松仁卻當眾稱讚Flora勤力，並取笑她已是一線演員，自己要退居二線。
日前Flora的緋聞男友陳豪為羅浮宮婚紗拍攝廣告，有報道指陳豪的經理人公司推薦Flora擔任廣告女角，但最後因羅浮宮嫌棄Flora曾離婚，為免影響形象及薪酬問題，故選擇左慧琪頂上。Flora昨日在活動上被問到此事時心情未有受影響，相反更出言力撐陳豪。
Flora說：「我冇聽過呢啲傳聞，亦冇人搵過我拍婚紗廣告。可能呢排冇新聞啲人又繼續作嘢，好多謝佢哋先，其實我同陳豪都會互相介紹工作，我哋唔介意一齊工作，有錢齊齊搵，我亦都好支持呢位朋友。」看來Flora對陳豪相當信任。
此外，有報道指葉璇近日釣得金龜婿有新戀情，昨日她十分氣憤說：「新男友？嘥氣啦，個男仔唔係有錢仔，我哋已經識咗五年，只係普通朋友，如果釣到金龜婿就唔使拍劇咁辛苦。重有當日嗰袋物品，只係我預備送畀爸爸嘅父親節禮物，並唔係乜嘢戰利品。」
採訪：卓寶花
攝影：仇志中
