雖然噚日係黑色星期五，但仍敵不過紅潮的沖喜效應，加上美股持續上升，刺激淡友平倉，好友則加大注碼，港股一舉突破9800阻力，恒指收報9855，升118點，成交達122.39億元。資金仍然集中追捧中資股，中移動（941）大發神威，勁升4.2%，收18.95元，成交高達5.26億元，為近期罕見。
市場繼續傳中國將落實QDII，而中國給予港貨零關稅的優惠亦將落實。不過，長和系近日遭KPN反控索償，加埋俾標普調降信貸評級，兩股表現斯人獨憔悴，無升跌。
據聞早前勁炒工業股之對沖基金，已轉炒國企及紅籌股，繼裕元（551）前日大幅回吐後，噚日又見思捷環球（330）遭拋售，股價挫4.6%，成交達1.47億元。黛麗斯（333）基金股東配售後，股價曾炒高逾20%，近日亦開始回軟，但暫時仍守在1.20元以上水平；德永佳（321）配售完之後未正式炒過，噚日成交大增至6933萬元，但股價升幅唔大，僅2.46%，收6.25元，好有可能是大戶想出貨轉炒國企。
早前主要股東配售1.36億股予投資者的毅力工業（332），走勢持續強勁，市場有好消息傳出，話公司接獲美國最大連鎖零售店Wal-Mart的20億元供貨合約。若傳聞屬實，毅力真係唔愁冇得做。
中石化冠德（934）近日股價異動，噚日再升逾8%，成交3298萬元。傳聞話殼牌會將國內合營投資項目注入冠德，以換取冠德控制性股權。
不過，以殼牌咁大個牌子，使唔使玩借殼呀？早前此股傳過大股東中石化（386）想將佢私有化，公司則話未有聽聞。
阿虎