陳慧琳（Kelly）昨日出席郵政活動，特首董建華以及多位高官亦有到場，論受歡迎程度，Kelly倍勝特首和高官，贏得最多掌聲。Kelly在活動中親自把明信片寄給一位韓國歌唱老師，答謝對方不怕SARS來港教她唱歌。
陳慧琳昨日以郵政大使身份，出席在中環郵政總局舉行的「心意傳千里」活動，特首董建華和財政司司長梁錦松等高官均有到場，吸引數十名巿民圍觀。
其間Kelly曾與董特首握手，但雙方未有談話，雖然現場高官眾多，但Kelly表現淡定，得到的掌聲更勝高官。儀式開始時，眾嘉賓在明信片上寫上親友的姓名和地址，然後將明信片放進郵筒。
事後Kelly說：「我前日先收到通知要出席呢個活動，但我今日都唔緊張，冇speech（演講），而我喺張卡度寫咗一個韓國歌唱老師嘅地址，因為佢好好，早排SARS肆虐嗰陣時，佢都肯嚟香港教我唱歌。」
Kelly明天會獲贊助五分鐘免費長途電話，她表示會致電身在美國的婆婆和阿姨，明日是父親節，問Kelly會否與爹哋慶祝？她說：「我會同爹哋食飯，食早飯呀，但禮物就未睇啱，可能會畀大利是。」
此外，Kelly透露她獲得旅遊機票優惠，稍後將起程到西班牙，為廣東碟影封面照。
Kelly說：「今次去西班牙，係因為嗰邊風景好靚，所以至喺嗰邊取景。去完西班牙，重要趕去台灣拍MV，其實個
MV已經遲咗兩、三個月拍，可能到時都要被隔離，因為冇得再延遲，再遲就會撞拍《無間道Ⅲ》個期。」
採訪：梁錦雯
攝影：陳慧安