郭富城噚日喺葵涌和宜合道運動場，為RoadShow《香港樂悠遊》嘅葵青區節目拍攝介紹短片，其實城城不嬲都係住港島區，不過由於吳君如早前已經介紹咗港島東區，所以城城惟有介紹葵青區啦！
城城拍攝呢個打高爾夫球片段都算係一波三折，原本係安排上個禮拜拍攝，點知遇着黃色暴雨而要取消，噚日再拍一樣落雨。
最搞笑嘅係城城原來唔識打高爾夫球，佢自己都話咁大個仔只係打過一次，正因為打高爾夫球唔係城城嘅強項，佢就猛同馮仁昭講賽車，重話會以旅遊大使嘅身份建議喺香港興建大型賽車場，咁𠵱家香港又的確冇賽車場，如果城城真係想介紹賽車嘅話，睇嚟佢應該介紹何文田區嘅公主道囉！
章子怡同劉燁合作拍嘅電影《茉莉花開》已經完工，𠵱家套戲搞緊後期，馮仁昭收到風話章子怡會為套戲首次開腔主唱插曲，原來章子怡一直好鍾意唱歌，聽過嘅人都話佢歌喉唔錯，以佢嘅國際知名度，曾經就有國際唱片公司想幫佢出碟㖭，但章子怡婉拒話唔想做歌星住。
石修個仔陳宇琛（石仔）噚日喺中環一間舖頭揀父親節禮物，佢揀咗個高爾夫球袋送畀老竇，問佢點解唔揀多份禮物送畀好朋友嘉碧儀，佢就話費事有啲冇嘅又呷醋。石仔出道冇耐已經同嘉碧儀、Kawaii傳緋聞，遲啲又喺無綫嘅青春劇裏面演花花公子，連佢自己都笑住話：「係啦！做番自己囉。」
劉德華早前接受商台節目訪問，講話佢同老竇都鍾意扮智者，佢話：「我同佢都鍾意懶叻，乜都要得囉！唔一定要贏，但一定乜都要知。」聽日父親節，華仔最希望父親永遠身體健康，佢話：「老竇好鍾意短袖同有兩個袋嘅恤衫，我見到就會買畀佢，但唔會送太多，因為佢鍾意錢多啲。」
陳司翰（Victor）近排除要宣傳佢擔正演出嘅台灣新劇外，最近更成為呍呢嗱味可口可樂嘅代言人，佢噚日就喺台灣宣傳。雖然呢幾日落大雨，但佢一出現就出晒太陽，真係天公造美。佢當日以全黑西裝、戴黑超姿態出現，似足該廣告香港版入面黃秋生嘅造型，但係喺三十四度高溫下，Victor狂流汗，佢之後重大叫話：「演員賺的錢果真是血汗錢！」
狄龍同譚俊彥兩父子噚日一齊去咗新城接受家燕姐節目訪問，聽日係父親節，譚俊彥話已經準備咗份禮物，佢入行以嚟都好少緋聞，狄龍話佢咁大個仔就算拍拖都好正常，但譚俊彥話感情嘅嘢唔想講，佢話唔想似啲人用緋聞做宣傳，狄龍於是即刻好威嚴咁叫個仔唔好講人哋啲嘢，搞到譚俊彥即刻收聲。
