記者一向識幫人爭取權益，但講到自己權益就好少出聲，好似呢幾年新聞多多嘅立法會，採訪記者人數愈來愈多，記者室地方就愈來愈小，唔夠電話用之餘，傳真機又成日壞，一班採訪立法會新聞嘅行家終於忍無可忍，前日聯署向主席范徐麗泰同行政管理委員會陳情，八方估唔到范太咁有效率，噚日一早帶隊去記者室視察。
范太第一個睇嘅地方，就係早年被徵用放電腦點票嘅記者室房仔，點知噚日一打開門，電腦就冇，只有櫃、櫈同大堆法律部文件，主席一問之下，原來電腦好早搬走咗，文件之前就想做微型菲林，點知之後又話唔做，結果間房仔變咗雜物房，主席一聲令下，立刻要將雜物房變返記者室。
其後范太又研究喺記者室加寬頻上網，點知有職員話要成四千蚊個月，嚇到范太彈起，因為佢都係用「$298無限上網」，後來搞完一輪，原來四千蚊係六十個議員同一時間上網嘅費用。
傳真︰2623-9278
電郵︰