《基本法》二十三條大石砸死蟹，各方人士都諗緊如何表達憤慨之情，有民主派人士話不如集體辭去議員之職，等老董冇面，不過，噚晚聽民主黨嘅口風，佢哋十一友劈炮嘅機會等於零。
當然主席楊森有佢哋嘅理由，而本來好激嘅鄭家富，睇嚟已收晒火，只係話一切等黨決定。但係八方就有興趣知假如民主黨走晒，邊個會最開心？老董會有乜反應呢？特首辦對於八方呢啲假設性嘅問題梗係唔會答；問佢哋幾時先見楊森佢哋，又係嗰句──未有安排。至於楊森就第一時間答話：「你估老董會為我哋眼濕濕咩，佢肯定會開支紅酒，或者唔飲紅酒飲茅台。」
咁又係喎，老董咪話過佢哋拒絕與時並進，又話佢哋「膚淺」，班眼中釘起晒身，佢就安樂晒。
除咗老董之外，以曾鈺成為首嘅民建聯亦會好高興，單仲偕話相信佢哋會拍爛手掌；佢重反問八方，如果二十三條一過，民主黨派議員全部辭晒職，《蘋果》停刊、黃毓民封咪，咁係咪對香港好好呢？
咁大條問題，八方唔識答，但係董生可能會喺禮賓府擺番十幾廿圍酒慶祝吓。重有，會成日落去立法會出席答問大會。
傳真︰2623-9278
電郵︰