國企噚日上演大龍鳳，國企指數大升74點，升幅2.9%，個別股票的升勢凌厲，一直備受看好的鋼鐵股就一飛沖天，以馬鋼（323）最突出，高收1.12元，大升12%，交投更係天文數字的2億股；重鋼（1053）亦步亦趨，高收1.58元，升9.7%。
國企咁勁，主要係有消息話QDII快會落實，基金同大行一直以來都係國企的捧場客，今次自然趁勢推上去。當然，就算QDII搞掂，都起碼要幾個月時間先會有「水」到，以𠵱家H股比A股折讓咁大，下半年真係有排升。
基金揸重嘅國企，遲早會爆炸性上升，噚日收收埋埋芬佬啲料，佢哋對國企後市嘅信心真係爆棚，甚至有人話，升勢𠵱家先係開始再起步，後市起碼升5成，個別更可翻一番。
兗州煤業（1171）跟勢而上，高收3.5元，升4.4%，呢隻係大基金垂青嘅國企，到5月底為止，摩根大通就持有其1.74億H股，佔發行股數6.07%，呢個數超過5%，要公布，其他基金揸少過5%，唔使公布，但相信唔會少。
兗煤去年（12月年結）營業額63.56億元（人民幣．下同），升30%，盈利12.22億元，升26%，每股盈利0.43仙。今年首季由於煤炭銷售談判未有結果，盈利只升1.8%至2.59億元。
煤炭企業與主要電力集團對電煤作價遲遲未能達成協議，到上月，政府被迫出手，規定今年電煤每噸加幅為8元，與去年一樣，加價貼近煤炭企業的要價，對兗煤有利。預期今後數年，煤炭價格每年增幅約3%，保證兗煤盈利有穩定增長。
根據國資委公布的數字，今年1至4月，32戶煤炭重點企業實現利潤7.8億元，升25.9%，其中有盈利佔27戶，賺8.6億元，升16.2%，工業總產值134.3億元，升12.2%。以此推算，保守估計兗煤03年度盈利會有12%增長，至13.6億元，每股盈利48仙（折約45港仙），以PE10倍計，股價可見4.5元。
過去兩年兗煤升到3.6元水平就回落，今次係第4次上試，一破位而上，大型升浪即可確認，目標4.7元。基金收集同揸咗咁耐，冇30至40%利潤，點會心足？
郭兆誠