早前經已運嚟全新至頂級豪華760Li轎車嘅寶馬代理，起初亞Mark以為佢哋只會靜待部開篷Roadster嘅Z4到臨，點知轉過頭收到消息，話代理跟車廠洽商過後，決定即時在港加推多25部2003年製造嘅730Li（馬力231匹）轎車應市，重以特惠價78萬8千9作招徠，足足較原定97萬嘅車價，便宜咗成18萬1千1咁多。相信有此決定，會係與奧迪A8嘅正式登場有莫大關聯呢！以現今寶馬新7系嘅受歡迎程度，設備既齊全重有咁High-tech嘅i-Drive系統輔助，響新稅制嘅陰霾下，代理竟然重可以唔到79萬加推部730Li，今勻真係要有買趁快喇！