烏天黑地雷雨交加之際，左丁山行經雲咸街娛樂行，見到賓架P站在大廈內避雨，急忙上前，舉起把遮，問佢想去邊。賓架P話：「一路行大廈天橋，唔使雨遮，點知行到呢度，重有幾步出唔到去。心諗冇理由冇中環老友行過嘅啫，果然見到你。」既然街頭相遇，當然同佢做落雨擔遮死黨，護送一程。
賓架P上星期剛自日本回港，佢話東京機場旅客大幅度降低，過關比以前快好多。東京如此，香港亦然。但賓架P好唔滿意赤鱲角機場因為人客少，竟然取消機場內列車服務，乘客入咗閘之後，要一路行去登機閘口，行到腳軟。
賓架P話：「NormanFoster設計呢個機場，因面積遼闊，故此要有列車接送乘客，呢樣係基本服務（essentialservice），就算乘客少，都應該保留，因慳電而停開，令乘客不便，實在太過小家，啲長者乘客更加辛苦㖭。」
冇列車坐，大可坐電動小車，有司機，就算去第八十八號閘，都話咁快就到，但係要錢嘅噃，每位盛惠四十元，一家四口就要一百六十，毛利非常高，而以前搭列車就唔使錢。機管局無疑在非常時期要慳得就慳，但連基本服務都慳埋，實在有損國際形象，譬如幾位外國阿婆阿嬸落咗機，冇火車坐，點會唔唱衰香港。香港機場係世界最佳機場之一，名譽得來不易，唔可以無端蒙污㗎。