女人堆中長大　特別有女人緣
Edison俾家姐呃係弧兒痛哭

陳冠希（Edison）在加拿大度過大半童年，最令Edison難忘的是七歲那年，二姊陳見飛突然對他說，他並非父母親生，只是領養回來，當時Edison信以為真，傷心得躲在衣櫃裏哭得死去活來。

陳冠希和陳見飛同時投身娛樂圈，兩姊弟童年時已長得活潑可愛，十分討人喜歡。Edison有兩個姊姊，三人自小在加拿大與母親一起生活，Edison到十歲才從加國回港，父親陳澤民則在Edison四、五歲時返香港做生意。父親雖不在身邊，但小Edison遇上不快事時，總懂得打電話向父親哭訴。

「家姐一巴打過嚟」
Edison日前說：「細個喺加拿大生活冇乜朋友仔，多數同兩個家姐跟鄰居Monica玩，我喺女人堆中成長，所以我同女人會特別好傾。不過有乜唔開心，就會打長途電話畀爹哋。
「記得六歲時，有次媽咪揸車同我、家姐出街，我喺車度同媽咪講話想食思樂冰，點知大家姐Olivia一巴打過嚟，當時我真係好委屈，返到屋企就喊住打電話畀爹哋，爹哋不斷安慰我，話家姐唔係有心，叫我唔好嬲家姐。」

旅行時幾乎浸死
Edison續說：「七歲時我同媽咪、家姐去麥當勞食嘢，二家姐（陳見飛）無端端同我講，話『你啲頭髮係啡色，唔係黑色，其實係因為你原本叫阿Dick，唔係叫Edison，你係領養返嚟』，當時我聽到好傷心，返到屋企就匿喺衣櫃度喊。後來媽咪話冇咁嘅事，家姐又話係講笑，我先至開心番。雖然細個成日覺得家姐蝦我，但記得有年同爹哋、媽咪去菲律賓旅行，我幾乎浸死，都係大家姐救番我嘅。」
採訪：陳月媚